כ"ק אדמו"ר מוויזניץ שליט"א פון לאנדאן וועט מארגן מיטוואך ארויספארן אויפן וועג קיין ניו יארק, מיטן ציהל אויפצוטרייבן גרעסערע סכומים צו פינאנצירן די מאסיווע פראיעקט מיטן אפקויפן פרישע בנינים לטובת מוסדות וויזניץ אין לאנדאן. דער רבי וועט זיך אויפהאלטן פון מיטוואך נאכמיטאג ביז דאנערשטאג צופרי לרגל די שמחת החתונה בחצרות הקודש וויזניץ, און דאנערשטאג צופרי ארויספארן קיין לעיקוואד וואו דער רבי וועט וויילן די קומענדיגע וואך, און באשיינען א רייע מסיבות און מעמדים לטובת די מוסדות.
די הויכפונקט פונעם באזוך וועט זיין דעם קומענדיגן שבת פרשת וישב וואס דער רבי וועט אין א ערשטמאליגע פארנעם פראווענען אינעם עיר התורה והחסידות לעיקוואד, די גאנצע שבת די תפילות און טישן וועט פארקומען אין ביהמ"ד שמן למנחה נאדיפאלי אין די בראקהיל געגענט, וואס ווערט געפירט דורכ'ן רבינ'ס שוואגער הגה"צ ר' שאול שמחה פריעדמאן שליט"א, ביידע איידימער ביי כ"ק אדמו"ר מקאלוב שליט"א.
ספעציעל גרייטן זיך די חסידים פון אמעריקע צו מיטהאלטן די ערשטע חנוכה ליכטל, וואס דער רבי וועט פראווענען על אדמת ניו יארק, געציילטע שעה בעפארן ארויספארן אויפן וועג צוריק אהיים קיין לאנדאן, די מעמד הדלקת נר חנוכה וועט בעז"ה פארקומען בהיכל ישיבה גדולה תפארת מרדכי וויזניץ אין סטעטן איילענד, וואס געפונט זיך היבש נאנט צום לופטפעלד, פון וואו דער רבי איז ערווארטעט ארויסצופארן אויפן וועג אהיים תיכף נאכן ליכט צינדן.
