היינט מוצאי שבת וועט כ"ק אדמו"ר מטאהש שליט"א ארויספארן אויף א געהויבענע מסע הקודש צום עיר האבות טאהש אין אונגארן, לקראת די יומא דהילולא קדישא פון זקינו הקדוש הרה"ק רבי אלימלך מטאהש זי"ע באקאנט אלס דער סבא קדישא, מקום מנוחת קדשו אין שטאט טאהש און איז מסוגל אלס א מקום תפילה וישועה.
דער רבי שליט"א נעמט אונטער דעם קורצן נסיעה אינאיינעם מיט א ענגע צאל מקורבים ונכבדי העדה, אנקומענדיג קיין פוילין מארגן זונטאג פארמיטאג, וועט דער רבי פוקד זיין דעם ציון הק' פונעם זיידן דער הייליגער תוספות יום טוב זי"ע אין שטאט קראקא, פון דארט וועט דער רבי פארזעצן די נסיעה קיין ליזענסק, אויף א תפילת רבים ביים ציון הק' פונעם הייליגן רבי'ן רבי אלימלך זי"ע, וואו מען וועט אויסזאגן גאנץ ספר תהלים כנהוג.
מאנטאג אינדערפרי וועט דער רבי אנקומען צום שטאט טאהש אין אונגארן, און זיך דארט אויפהאלטן ביז דינסטאג נאכט במוצאי הילולא קדישא. מאנטאג אויפדערנאכט בליל ההילולא וועט דער רבי דאווענען מעריב און אפרעכטן די יארצייט טיש אינעם בנין הכנסת אורחים אין שטאט טאהש וואס שטייט בנשיאותו פונעם רבי'ן שליט"א. שפעטער ביינאכט נאך חצות הלילה וועט דער רבי פוקד זיין דעם ציון הק' מיט גרויס התעוררות און אויסזאגן ספר תהלים בהשתפכות הנפש.
פון טאהש וועט דער רבי ארויספארן קיין קערעסטיר און פוקד זיין דעם ציון הק' פון הרה"ק רבי ישעי'לע קערעסטירער זי"ע, דערנאך וועט זיך דער רבי ארויסלאזן אויפן וועג צוריק אהיים קיין קרית טאהש קאנאדע, אנקומענדיג למעון קדשו מיטוואך ערב חנוכה.
