מטעם בית כ"ק אדמו"ר מטשערנאביל שליט"א איז געמאלדן געווארן אז דעם קומענדיגן דאנערשטאג ויגש ביום המסוגל זאת חנוכה, וועט דער רבי שליט"א ארויספארן צום עיר האבות חברון אויף א געהויבענע מעמד תפילה ביי די קברי אבות אין מערת המכפלה, אינאיינעם מיט די תומכי המוסדות וואס שליסן זיך אן אינעם רבינ'ס חבריא נושאי הארון.
די מעלדונג קומט נאך א רייע פעולות נשגבות וואס די הנהלת המוסדות לייגט אריין די לעצטע פאר וואכן, אוועקצושטעלן א יסוד איתן פאר די טשערנאבילער מוסדות בארץ הקודש, און אפווישן די שווערע חובות וואס הויערט אויפן רבינ'ס פלייצעס די לעצטע תקופה. פארלאפענע וואך איז פארגעקומען א געהויבענע שבת "בצילו חמדתי" אין דאוואס שווייץ, וואו דער רבי האט געוויילט אינאיינעם מיט די גרעסערע תומכים און נדיבים.
אצינד ווערט געמאלדן אז די אלע חסידים וואס שליסן זיך אן אינעם רבינ'ס רוף צו געבן דריי הונדערט שקל פאר די מוסדות מדי חודש בחדשו, וועלן האבן די זכיה ארויסצופארן מיטן רבי'ן אויף א תפילה ביים מערת המכפלה אין חברון, ווען דער רבי וועט אין א ערשטמאליגע שריט מתפלל זיין ביי די קברי אבות אינאיינעם מיט די חסידים להיוושע בכל מילי דמיטב.
