אין א פריידיגע שטימונג גרייטן זיך כלל חסידי סקולען פון וויליאמסבורג צום ערשטן מעמד וואס וועט אפגעראכטן ווערן בהיכל בית המדרש החדש אין ניי וויליאמסבורג, ווען די געהויבענע מעמד הדלקת נר חנוכה וברכת שהחיינו וועט פארקומען בהיכל ביהמ"ד הגדול וואס ווערט אצינד פארענדיגט לשם ולתפארת.
כ"ק אדמו"ר מסקולען שליט"א פון וויליאמסבורג וועלכער האט איבערגענומען די הנהגת העדה אין וויליאמסבורג, האט מייסד געווען די קהילה קדושה "מאור ישראל" סקולען אין ניי וויליאמסבורג, מיט איבער א יאר צוריק איז אפגעקויפט געווארן א פרישע געביידע ביים ווינקל פון סענפארד סטריט און פארק עוועניו, וואו עס איז אנגעגאנגען העפטיגע בוי ארבעט פאר לאנגע חדשים אהערצושטעלן דעם נייעם בנין לשם ולתפארת.
אצינד ווערט געמאלדן אז די בית המדרש וועט צום ערשטן מאל באנייעט ווערן היינט אויפדערנאכט ביים מעמד הדלקת נר חנוכה דורכ'ן רבי'ן, דער רבי וועט צינדן די נרות ברוב עם הדרת מלך יעדע נאכט חנוכה, אויסער מוצאי שבת און מאנטאג נאכט. נאך חנוכה וועט מען פארזעצן מיט די רענאוואציעס, ביז די לאנג ערווארטעטע שבת חנוכת הבית וואס וועט פארקומען בעז"ה קומענדיגן חודש שבט, ביים שבת אויפרוף במעון הקודש פונעם רבי'ן שליט"א בנישואי בנו החתן.
