א ערשטמאליגע כינוס "אהבת תלמידים" איז געפלאנט וואו עס וועלן זיך צוזאמקומען הונדערטער תלמידים וחסידים פון די בארימטע קאשויער ישיבה, די תלמידים פון העכער א יובל יארן כולן שוין לטובה, וואס האבן געלערנט בישיבתו של רבי ביי הגה"ק מקאשוי זי"ע בעל ברכת שמים, ולהבחל"ח ביי בנו ממלא מקומו כ"ק אדמו"ר מקאשוי שליט"א וועלכער דינט שוין אלס ריש מתיבתא קדישא רבות בשנים.
די הייליגע ישיבה אונטערן נאמען "אהל שמואל" ד'קאשוי, וועלכער איז געגרינדעט געווארן דורך הגה"ק מקאשוי זי"ע און איז געווען סטאנציאנירט פאר לאנגע יארן אין קרית קאשוי בעדפארד היללס, האט נאכן הסתלקות פון הגה"ק מקאשוי זי"ע אריבערגעצויגן די הויפטקוואטיר קיין ברוקלין, און ערהאלטן דעם נייעם נאמען "אהל רפאל" לשמו ולזכרו פונעם מייסד וראש הישיבה. די ישיבה ווערט ווייטער געפירט בעוז ובגבורה דורך כ"ק אדמו"ר מקאשוי שליט"א בעל מח"ס ישא ברכה, וועלכער איז שוין געווארן אויפגענומען אלס ראש ישיבה דורך זיין גרויסן פאטער דער רבי זצ"ל צו שטיין אין שפיץ פון די הייליגע תורה אימפעריע.
אצינד הערשט גרויס התרגשות ביי די טויזענטער תלמידים פון אלע יארן, די עלטערע תלמידים פון צענדליגע יארן צוריק ביז די היינטיגע תלמידים, ווען מען גרייט זיך צו אן ערשטמאליגן כינוס אהבת תלמידים וואס וועט צונויפברענגען אלע צוזאם תחת קורת גג אחד, זיך פאראייניגן און אוועקשטעלן א פעסטע יסוד פאר די הייליגע ישיבה וואס בליהט און שיינט לשם ולתפארת.
די עסקנים וועלכע זענען באאויפטראגט אהערצושטעלן דעם גרויסן מעמד אין עטליכע וואכן ארום, קוקן אריין אין פארשידענע מעגליכקייטן אויסצוקלויבן א פאסיגע ארט וואו צו אפרעכטן דעם גרויסן מעמד, מיט גענוג פלאץ פאר אזויפיל משתתפים בלי עין הרע.
