בחצר הקודש וויזניץ אין מאנסי ווערט געמאלדן אצינד אז דער רבי שליט"א נעמט אויף זיין עלטסטן אייניקל הרה"ג ר' חיים מאיר האגער שליט"א, צו דינען אלס רב ואב"ד פון די שיינע בית המדרש "אור מרדכי" דחסידי וויזניץ אין מאנסי, שכונת יוניאן אין ספרינג וואלי.
הרה"ג ר' חיים מאיר האגער שליט"א איז דער עלטסטער זון פון בנו הגדול פון רבי'ן הגה"צ ר' יעקב יוסף האגער שליט"א, אן איידעם ביי כ"ק אדמו"ר מסקווירא שליט"א. ער איז אן איידעם ביי הרה"ג ר' ישראל אברהם אלטר טויב שליט"א אב"ד תולדות נפתלי קאלוב ב"פ, און איז פקיע שמיה מיט זיין כח התורה וההוראה, זייענדיג שוין עטליכע יאר פון די חשובע מרביצי תורה אין די וויזניצע ישיבה אין נייעק.
מיט עטליכע יאר צוריק איז געגרינדעט געווארן די וויזניצע שטיבל "אור מרדכי" אויף יוניאן ראוד אין ספרינג וואלי, לשמו ולזכרו פון כ"ק אדמו"ר הרה"ק בעל תורת מרדכי מוויזניץ זי"ע, די בית המדרש דינט אלס תל תלפיות פאר די צענדליגע חסידים וואס וואוינען דארט אין די געגנט, און פארמאגן א ווארעמע חסידישע ווינקל אויפן וויזניצער נוסח יעדן שבת בקביעות.
אצינד טוען די חברי הקהילה אויפנעמען מיט פרייד אז דער רבי שליט"א האט ממנה געווען זיין עלטסטן אייניקל הרה"ג ר' חיים מאיר שליט"א לכהן פאר צו דינען אלס רב הקהילה בכל צעד ושעל, און דעם קומענדיגן שבת פרשת ויגש וועט דער נייער רב שליט"א צום ערשטן מאל אפרעכטן די תפילות אין בית המדרש בשבת אחים גם יחד.
מוצאי שבת וועט פארקומען א גרויסע מלוה מלכה און מעמד הכתרה, מיטן פערזענליכן השתתפות פון כ"ק אדמו"ר מוויזניץ שליט"א וועלכער וועט מאציל זיין מברכות קדשו לכל העם הנאספים.
