פילע חסידי מודזיץ גרייטן זיך מיטצוהאלטן א געהויבענע מסע הקודש צו די קברי אבות, ווען כ"ק אדמו"ר ממודזיץ שליט"א גרייט זיך אונטערצונעמען א נסיעה צו פוקד זיין די מקומות הקדושים אין פוילין, לקדושים אשר בארץ המה, אינאיינעם מיט א סוויטע חסידים ואנשי מעשה וועלכע וועלן אויסנוצן די געלעגנהייט צו מתפלל זיין מיטן רבי'ן ביי די הייליגע פלעצער.
מאנטאג פרשת בא כ"ז טבת, וועט דער רבי שליט"א ארויספארן קיין פוילין און צוערשט אנקומען קיין ווארשא, דינסטאג דורכ'ן טאג וועט מען פוקד זיין דעם ציון הק' פונעם הייליגן דברי ישראל פון מודזיץ זי"ע, מקום מנוחת קדשו אויפן בית החיים אין שטאט ווארשא. אויך וועט מען פוקד זיין דעם ציון הק' פון הרה"ק רבי יחזקאל'ע קוזמירער זי"ע, די ציון הק' פונעם הייליגן רבי'ן ר' אלימלך פון ליזענסק זי"ע, און די קברי צדיקים אויפן אלטן בית החיים אין שטאט קראקא.
מיטוואך אויפדערנאכט ליל ראש חודש שבט, וועט דער רבי זיך ארויסלאזן אויפן וועג צוריק אהיים קיין ארץ ישראל, און די יעצטיגע טעג ווערן געמאכט די נויטיגע צוגרייטונגען דורך די עסקנים אויסצוארבעטן אלע דעטאלן פון די נסיעה און די צאל משתתפים אויפן בעסטן פארנעם.
