מיט בלויז צוויי וואכן פארבליבן צו די פרייליכע שמחת נישואין בחצר הקודש סאטמאר, שמחת החתונה פון א אייניקל ביי כ"ק אדמו"ר מסאטמאר שליט"א, די כלה א טאכטער פון בנו חביבו הגה"צ אבד"ק סיגעט שליט"א, איז נעכטן אויפדערנאכט ענדגילטיג באשטעטיגט געווארן אז די גרויסע חתונה וועט פארקומען אינעם עיר ואם בישראל בארא פארק, מקום מגוריו פונעם מחותן אבי הכלה.
מיט עטליכע וואכן צוריק איז שוין באשטעטיגט געווארן אז די גרויסע שבת של שמחה שבת שבע ברכות פרשת שמות, וועט געפראוועט ווערן בתוככי קהילה קדושה סאטמאר אין בארא פארק, אלע תפילות און טישן דורכ'ן גרויסן זיידן דער סאטמארער רבי שליט"א וועט פארקומען אין ביהמ"ד הגדול דקהל יטב לב ד'סאטמאר, און אצינד איז באשטעטיגט געווארן אז אויך די חתונה וועט געפראוועט ווערן ברוב פאר והדר אין שטאט בארא פארק.
די מעמד קבלת פנים וועט פארקומען אינעם גרויסן היכל בית המדרש אויף די צוויי און פופציגסטע סטריט, וואס וועט ווערן אהערגעשטעלט אויפן מאקסימום צו קענען אקאמאדירן די טויזענטער חסידים, נאכגעפאלגט מיט די מעמד החופה ברחובה של עיר, אויף די פערצנטע עוועניו ביים ווינקל פון די צוויי און פופציגסטע סטריט.
צו די סעודת החתונה און די ריקודין איז ספעציעל ארויסגעדינגען געווארן די ריזן פראכטפולע זאל "אולם הגדול", אינעם בנין פון ת"ת בעלזא אויף די זיבן און דרייסיגסטע סטריט, וואס וועט פארוואנדלט ווערן אין א סאטמארע שמחה צענטער מיט אלע אפטיילונגען פאר די חתונה הגדולה, די ריזן זאל פאר די ריקודין און מצוה טאנץ, און ספעציעלע זייטיגע היכלות פאר די סעודת החתונה פאר די בחורי חמד און תינוקות של בית רבן.
