פרייליכע נייעס ווערט געמאלדן פון מוסדות סאטמאר אין בארא פארק, אז דעם קומענדיגן מוצאי שבת קודש פרשת שמות וועט געפייערט ווערן די גרויסארטיגע מעמד חנוכת הבית פאר די נייע גיגאנטישע געביידע פון בית רחל ד'סאטמאר בנין פריעדמאן, וואס איז געבויעט געווארן מיט פראכט אין לויף פון די לעצטע יאר צייט, אויף א בליץ שנעלן טעמפא להרחיב גבולי הקדושה.
די ריזן געביידע ביים ווינקל פון די פערצנטע עוועניו און די צוויי און זעכציגסטע סטריט, איז מיט א יאר צוריק נאך געווען א ליידיגע שטח ווען עס איז פארגעקומען די מעמד הנחת אבן הפינה אין שפיץ פון כ"ק אדמו"ר מסאטמאר שליט"א. דורכאויס די לעצטע עלף חדשים איז די בוי ארבעט אנגעגאנגען אין פולן שוואונג ווען יעדן טאג האט מען זיך גערוקט פאראויס, און אצינד שטייט שוין די געביידע על תילה בנויה, לשם ולתפארת פון מלכות סאטמאר אין בארא פארק.
זעכציג קלאס צימערן צושפרייט אין זיבן שטאק, פארנעמט דעם ריזן געביידע מיט הונדערט טויזענט סקווער פיס, דערונטער א ריזיגע אודיטוריום פון צען טויזענט סקווער פיס, וואס וועט דינען אלס לאנטשרום פאר די טויזענטער תלמידות.
אצינד ווען מ'גרייט זיך צו פייערן די מעמד חנוכת הבית, ווען אין די זעלבע צייט גרייט מען זיך אויף א געהויבענעם שבת של שמחה בחצר הקודש סאטמאר אין בארא פארק, ווען כ"ק אדמו"ר מסאטמאר שליט"א וועט פראווענען דעם קומענדיגן שבת פרשת שמות בתוככי הקהילה אין בארא פארק, לרגל די שבת שבע ברכות פון א אייניקל, א טאכטער ביי בנו חביבו הגה"צ אבד"ק סיגעט שליט"א, איז באשטעטיגט געווארן אז די מעמד חנוכת הבית וועט געפייערט ווערן מוצאי שבת קודש ברוב פאר והדר, קאמבאנירט מיט א שמחת שבע ברכות במעון הקודש, און א גייסטרייכע כינוס פאר כלל תלמידי וחסידי סאטמאר אין בארא פארק, און וועט פארקומען אינעם ריזן אוידיטוריום אין די נייע געביידע.
