חסידי סקולען אין וויליאמסבורג גרייטן זיך צו א לעכטיגע קייט פון ימי שמחה וחדוה, ווען עס וועט געפראוועט ווערן די שמחת החתונה במעון הקודש פון כ"ק אדמו"ר מסקולען שליט"א פון וויליאמסבורג, בנישואי בנו החתן למזל טוב, ווען איבער אלעם שטייגט די התרגשות ווען מען גרייט זיך צו ענדליך באנייען דעם בית הגדול והקדוש, די פראכטפולע נייע בית המדרש וואס איז פארענדיגט געווארן לשם ולתפארת, אין הארץ פונעם עיר ואם בישראל ניי וויליאמסבורג.
די נייע בית המדרש איז שוין באנוצט געווארן דורכאויס די ימי החנוכה אויף א צייטווייליגע פארנעם, בלויז פאר די מעמדי הדלקת נר חנוכה ברוב עם הדרת מלך, אין די לעצטע פאר וואכן איז אנגעגאנגען העפטיגע בוי ארבעט, וואו מען האט פראכטפול פארענדיגט דעם בנין בתכלית היופי, און אצינד גרייט מען זיך צו פולקאם באנייען די בית המדרש הגדול והחדש, וואס וועט פארוואנדלט ווערן אלס קביעות'דיגע אכסניא פונעם רבינ'ס הויף, אנגעהויבן פון דעם שבת פרשת בא הבא עלינו לטובה.
די גרויסע שבת אויפרוף דעם שבת חנוכת הבית פרשת בא, וועט ווערן מיטגעהאלטן דורך הונדערטער חסידים פון נאנט און ווייט, ובראשם כ"ק האחים מרנן האדמורי"ם מסקולען שליט"א פון מאנסי און לעיקוואד, וואס וועלן קומען מיטהאלטן דעם שבת בשמחתו הגדולה פונעם עלטערן ברודער, און פראווענען אינאיינעם די תפילות און טישן, דורכאויס פרייטאג צונאכטס, שבת צופרי ביים שמחת האויפרוף, און שלש סעודות ברוב עם הדרת מלך.
די סעודות שבת ווערט צוגעשטעלט בהרחבה פאר די פילע געסט און קרובי השמחה, אין די זאלן פון גינת אסתר וואס געפונט זיך בשכינות צום נייעם ביהמ"ד, שבת אינדערפרי וועלן די דריי רבי'ס אפרעכטן אינאיינעם די סעודת עתיקא קדישא אינאיינעם מיט די חסידים לכבוד די שמחה, אין די זאל פון גינת אסתר.
די שמחת החתונה וועט פארקומען קומענדיגן מיטוואך פרשת בשלח ז' שבט, אין די זאלן פון עטרת טשארנא אין מאנסי, מקום מגוריו פונעם אבי הכלה הרה"ג ר' יואל ארי' שטערן שליט"א בן הגה"צ ראש ישיבת תורת חסד זצ"ל, און איידעם ביי כ"ק אדמו"ר מדאמבראווא שליט"א. שבת פרשת בשלח שבת שירה וועט דער רבי שליט"א וויילן אין מאנסי לכבוד די שבת שבע ברכות, און זונטאג פרשת יתרו וועט פארקומען די צענטראלע שבע ברכות, אינאיינעם מיט די גרויסארטיגע מעמד חנוכת הבית בהיכל ביהמ"ד הגדול והחדש אין וויליאמסבורג.
אין די יעצטיגע טעג איז דער רבי שליט"א ארויף לבתי אדמורי"ם ורבנים איינצולאדענען צו די שמחת החתונה, און באזונדער צום גרויסן מעמד חנוכת הבית בשילוב מיט די צענטראלע שמחת השבע ברכות, דער רבי האט באזוכט אין שטוב פון האדמורי"ם מסאטמאר, וויזניץ פון וומס"ב, ראחמיסטריווקא פון וומס"ב, קאשוי, גאב"ד קאשוי, אב"ד מכלל יופי, און נאך פיל רבנים ודיינים אפצונעמען ברכת קדשם לכבוד די שמחה, און לכבוד די מעמד חנוכת הבית.
כ"ק אדמו"ר מסקולען שליט"א פון ירושלים, וועט זיך ארויסלאזן קומענדיגע וואך אויף א באזוך קיין ניו יארק, צו באשיינען די שמחת החתונה בבית אחיו הגדול דער רבי פון וויליאמסבורג, און אזוי אויך די שמחת החתונה בבית גיסו הגה"צ ר' מאיר דוד סעקולא שליט"א אב"ד כליל תפארת סקולען, איידעם ביי הגה"צ אבד"ק סקולען ב"ב שליט"א, וואס קומט פאר קומענדיגע וואך מאנטאג אין בארא פארק.
אין אנדערע נייעס איז נעכטן מאנטאג געגאסן געווארן די יסודות פאר די נייע פריוואטע מקוה וואס ווערט געבויעט פארן רבי'ן שליט"א, אינעם פריוואטע צימער אין די נייע בית המדרש.
