שטייענדיג גענוי צוויי חדשים בעפאר די זיבעטע הילולא קדישא פון כ"ק אדמו"ר הרה"ק בעל תורת מרדכי מוויזניץ זי"ע, איז באשטעטיגט געווארן אז ביים היי יעריגן יארצייט וואס געפאלט ביום השבת קודש פרשת פקודי, וועלן אלע אכט ברידער כ"ק האדמורי"ם שליט"א לבית וויזניץ פראווענען דעם שבת יארצייט אינאיינעם בשבת אחים גם יחד, בבית מדרשו של רבי אין ביהמ"ד הגדול אין שיכון וויזניץ מאנסי, דארט וואו דער רבי זצ"ל האט געפראוועט פאר לאנגע יארן עבודתו בקודש.
דאס קומט פיר יאר נאך וואס עס איז געפראוועט געווארן דעם ערשטן שבת דורך אלע רבי'ס צוזאמען, ביומא דהילולא קדישא כ"ט אדר תשפ"א שבת החודש, א שבת וואס איז געקרוינט געווארן מיט גרויס הצלחה און איז געווארן מיטגעהאלטן דורך טויזענטער חסידים פון נאנט און ווייט.
ביי אן אסיפה דורך די ברידער האדמורי"ם עטליכע וואכן צוריק, האבן אלע ברידער אויסגעדרוקט א פאראייניגטע ווילן צו ווידעראמאל פראווענען א שבת יארצייט אינאיינעם, נאך וואס די היי יעריגע הילולא קדישא געפאלט אויך ביום השבת קודש, און די קומענדיגע מאל וואס עס וועט זיין אזא געלעגנהייט וועט זיין אין אסאך יארן ארום, ווען די פראגע אויב דעמאלטס וועט מען נאך קענען פראווענען א שבת יארצייט אלע ברידער אינאיינעם איז היבש שווער.
אין לויף פון די לעצטע פאר וואכן איז פארגעקומען א רייע אסיפות דורך די ראשי העסקנים און שליחי האדמורי"ם פון אלע הויפן, וואו עס איז אויסגעארבעט געווארן די פאקטישע דעטאלן צו קענען טאקע אונטערנעמען אהערצושטעלן אזא גרויסע שבת, און אין די יעצטיגע טעג איז עס פולקאם באשטעטיגט געווארן, ווען די עסקני הקהילות ארבעטן שוין אויף די פאקטישע צוגרייטונגען צו קענען אהערשטעלן דעם גאנצן שבת, סעודות שבת און הכנסת אורחים פאר טויזענטער געסט פון אלע שטעט, און אזוי ווייטער אלע פרטים וואס אזא שבת נעמט אריין.
צוליב דעם וואס מוצאי שבת און זונטאג איז ראש חודש ניסן, וועלן אלע ברידער האדמורי"ם ארויפגיין צום ציון הק' אין לויף פון דאנערשטאג און פרייטאג, שבת קודש פרשת פקודי שבת החודש וועט געפראוועט ווערן אין ביהמ"ד הגדול אין מאנסי אין שפיץ פון אלע ברידער מיט די באטייליגונג פון טויזענטער חסידים, און מוצאי שבת וועלן אלע רבי'ס פראווענען די יארצייט טישן באזונדער, במקומות מושבותיהם.
