אין די יעצטיגע טעג איז באשטעטיגט געווארן אז כ"ק אדמו"ר מוויזניץ שליט"א פון בית שמש וועט דאס יאר וויילן אויף יום טוב פסח אין קרית וויזניץ בני ברק, בצל הקודש פונעם שווער כ"ק אדמו"ר מוויזניץ שליט"א, און מיטהאלטן די סדר נאכט בצל חותנו הגדול.
דער וויזניצער רבי שליט"א וועלכער איז ערווארטעט ארויסצופארן אין די נאנטע וואכן קיין לאס אנדזשעלעס אויף א לענגערע מעדיצינישע פראצעדור, וועט מיטן אויבערשטנס הילף זיך אומקערן אהיים למעון קדשו לקראת יום טוב פסח הבעל"ט, און לויטן פלאן וועט ער פראווענען דעם סדר נאכט און גאנץ יום טוב אויף א פארמאכטע פארנעם בלויז מיט די בני המשפחה.
נישט וועלנדיג אויסלאזן אזא געלעגנהייט ווען דער וויזניצער רבי וועט פראווענען א סדר בלויז מיט די בני המשפחה, האט חתנו הגדול דער וויזניצער רבי פון בית שמש אויסגעדרוקט רצון קדשו צו מיטהאלטן דעם סדר, און וויילן אויף יו"ט פסח בצל הקודש פונעם שווער. כמנהג וויזניץ אז דער רבי פארט נישט בכלל דורכאויס די חול המועד טעג, וועט דער רבי וויילן אין בני ברק דורכאויס די גאנצע ימי החג, און איינטיילן די תפילות און טישן, טייל בצל הקודש פונעם שווער דער וויזניצער רבי שליט"א, און טייל בבית מדרשו אויף רחוב מלצר אין בני ברק.
