די קבוצה נכבדה פון יחידי סגולה, וועלכע שטייען צו די רעכטע האנט ארויסצוהעלפן משאת נפשו פון כ"ק אדמו"ר מראחמיסטריווקא שליט"א, און העלפן דעם רבי'ן טראגן דעם עול החזקת ישיבתו הקדושה, וועלן האבן די זעלטענע זכיה מיטצוהאלטן א היסטארישע נאכט בצל הקודש, ווען דער רבי שליט"א קומט צו פארן מהתם להכא צו פארברענגען מיט די נדיבי עם, און מרעיף זיין טללי תחיה מקירוב הלב.
דער רבי שליט"א וועלכער טראגט אויף זיינע פלייצעס די עול החזקת התורה, פון די גרעסטע חסידישע ישיבה אלוועלטליך, ישיבה הקדושה מאור עינים ראחמיסטריווקא מיט אירע נאנט צו אכט הונדערט תלמידים בחורים מצויינים, וועט אצינד ארויסקומען אויף א ספעציעלע בליץ נסיעה קיין ניו יארק לטובת דעם מבצר התורה, און אין א זעלטענע שריט שענקן פערזענליכע מאמענטן פאר די נדיבים בעם די יחידי סגולה, וואס וועלן האבן די זכיה צו ווערן אריינגעשריבן בספרן של צדיקים, און ערהאלטן א אונטערגעשריבענע כתב השפעת קודש פונעם רבי'ן שליט"א פאר זייער הילף לטובת המוסדות.
דער רבי שליט"א וועט ארויספארן ממעון קדשו אין ירושלים קומענדיגן אנהייב וואך פרשת משפטים, און וועט זיין צוגאסט אין ניו יארק בלויז פיר און צוואנציג שעה. דינסטאג נאכט ליל כ"א שבט, וועט פארקומען די ספעציעלע מעמד יחידי סגולה, וואו עס וועלן זיך צוזאמקומען בלויז די געלאדנטע געסט די יחידי סגולה, און מיסב זיין על שולחן מלכים מיטן רבי'ן אינאיינעם.
