תלמידי וחסידי קאשוי אין מאנסי גרייטן זיך מיטצוהאלטן א געהויבענע שבת בצל הקודש פון כ"ק אדמו"ר מקאשוי שליט"א, וועלכער וועט צום ערשטן מאל אפרעכטן א שבת אין די נייע ביהמ"ד "ברכת שמים" קאשוי, וואס שטייט בנשיאותו פונעם רבי'ן שליט"א.
די שיינע בית המדרש איז געעפנט געווארן מיט עטליכע חדשים צוריק, אין א שיינע לאקאל אויף סוזען דרייוו אין מאנסי, וואו פילע תלמידים ויוצאי הישיבה קומען זיך צוזאם מדי שבת בשבתו, און פראווענען אינאיינעם די תפילות און שלש סעודות בשבת אחים. אצינד איז באשטעטיגט געווארן אז צום ערשטן מאל זינט די התייסדות הקהילה וועט דער רבי שליט"א פראווענען א שבת בתוככי הקהילה.
דעם שבת בשלח שבת שירה וועט דער רבי זיין צוגאסט אין מאנסי, און פראווענען די תפילות און טישן אינעם נייעם בית המדרש. שבת שירה איז אלע יארן געווען א גרויסע שבת אין קאשוי, ווען אלע תלמידים וחסידים זענען געקומען וויילן ביים רבי'ן אין הויף אויף א שבת התאחדות, און דאסמאל וועט עס פארקומען בקרב הקהילה אין מאנסי, וואו עס ווערט צוגעשטעלט די סעודות שבת מיט א ברייטע פארנעם.
