אין בעפארברייטונג צו די שמחת החתונה פון א אייניקל ביי כ"ק האדמורי"ם מוויזניץ שליט"א פון לאנדאן און מאנטריאל, וואס קומט פאר קומענדיגע וואך אין שטאט מאנסי, איז באשטעטיגט געווארן די זמני הנסיעות פון די זיידעס כ"ק האדמורי"ם מוויזניץ שליט"א, וועלכע וועלן באשיינען בראש השמחה סיי ביים שמחת האויפרוף, ביים שמחת החתונה, און די נאכפאלגענדע שבת שבע ברכות אין מאנסי.
די חתן איז א זון פון הגה"צ ר' לייבוש האגער שליט"א ראש כולל וויזניץ לאנדאן, בנו הגדול פון כ"ק אדמו"ר מוויזניץ שליט"א פון מאנטריאל, און איידעם ביי זיין פעטער כ"ק אדמו"ר מוויזניץ שליט"א פון לאנדאן, איידעם ביי כ"ק אדמו"ר מקאלוב שליט"א. די כלה איז א טאכטער פון הגה"צ ר' מענדיל האגער שליט"א, זון פון כ"ק אדמו"ר מוויזניץ שליט"א פון מאנטריאל, און איידעם ביי זיין פעטער כ"ק הגה"צ אבד"ק ראחמיסטריווקא מאנסי שליט"א.
לכבוד די שמחת האויפרוף וואס קומט פאר דעם שבת קודש פרשת בשלח שבת שירה בעיר הבירה לאנדאן, וועט דער זיידע כ"ק אדמו"ר מוויזניץ שליט"א פון מאנטריאל אונטערנעמען א קורצע נסיעה קיין לאנדאן, און פראווענען דעם שבת אינאיינעם מיט אחיו הגדול ומחותנו דער וויזניצער רבי פון לאנדאן, אין ביהמ"ד הגדול אמרי חיים וויזניץ. פרייטאג צונאכטס וועט אויך פארקומען די שמחת השלום זכר פון א אור אייניקל ביי ביידע רבי'ס, אייניקל פונעם מחותן אבי החתן הגה"צ ר' לייבוש האגער שליט"א.
מוצאי שבת וועט פארקומען די שמחת הפארשפיל און מסיבת פרידה אין וויזניצע ביהמ"ד, מיט די באטייליגונג פון הונדערטער תושבי העיר רבנים ואדמורי"ם. זונטאג מיטאג וועלן ביידע ברידער האדמורי"ם ארויספארן אויפן וועג קיין ניו יארק, וואו די גרויסע חתונה וועט פארקומען דינסטאג יתרו הבעל"ט אין ביהמ"ד הגדול אין שיכון וויזניץ מאנסי. דער וויזניצער רבי פון לאנדאן וועט האבן די אכסניא אין שטוב פון הנגיד החסיד ר' יעקב יהושע פיש הי"ו, און דער וויזניצער רבי פון מאנטריאל וועט האבן די אכסניא אין שטוב פון הנגיד החסיד ר' חיים מאיר ציג הי"ו.
זונטאג אויפדערנאכט ביים אנקומען קיין מאנסי, וועט דער וויזניצער רבי פון לאנדאן זיך באטייליגן ביים שמחת השבע ברכות בבית גיסו כ"ק אדמו"ר משאץ שליט"א פון מאנסי. אין די זעלבע צייט וועט דער וויזניצער רבי פון מאנטריאל אריינפארן קיין בארא פארק, און באשיינען די שמחת הבר מצוה פון א אייניקל, עלטסטע זון ביי זיין זון הגה"צ ר' ברוך האגער שליט"א, וואס קומט פאר דעם קומענדיגן זונטאג אין בית אסתר זאל אין בארא פארק.
מיטוואך ממחרת החתונה וועט פארקומען א ספעציעלע פריוואטע שבע ברכות, געאייגענט פאר די אינגעלייט יוצאי ישיבה גדולה בית ישראל וויזניץ אין לאנדאן, וועלכע וואוינען אין ניו יארק. דאנערשטאג אויפדערנאכט וועט פארקומען די שמחת הווארט פון נאך א אייניקל ביים ביי כ"ק אדמו"ר מוויזניץ שליט"א פון לאנדאן, מיט די כלה א אייניקל ביים שוואגער הגה"צ אבד"ק ראחמיסטריווקא מאנסי שליט"א, אין ביהמ"ד הגדול וויזניץ אין מאנסי.
שבת קודש פרשת יתרו קבלת התורה, וועט פארקומען די שבת של שמחה שבת שבע ברכות אין ביהמ"ד הגדול וויזניץ אין מאנסי, ווען די דריי ברידער כ"ק האדמורי"ם שליט"א פון מאנסי, לאנדאן, און מאנטריאל, וועלן אינאיינעם אפרעכטן די תפילות און טישן בשבת אחים גם יחד.
דערווייל איז נאכנישט קלאר אויב דער וויזניצער רבי פון לאנדאן וועט זיך אומקערן למעון קדשו אין לאנדאן זונטאג משפטים, אדער פארבלייבן נאך עטליכע טעג צו באשיינען עטליכע שמחות אין די וויזניצע הויפן, מאנטאג נאכט די שמחת החתונה פון א אייניקל ביים שוואגער הגה"צ ר' אהרן מענדיל טווערסקי שליט"א בנו הגדול פון כ"ק אדמו"ר מסקווירא שליט"א, דינסטאג נאכט די שמחת החתונה פון די כלה א טאכטער ביים פלומעניק כ"ק אדמו"ר מוויזניץ שליט"א פון בארא פארק, און מיטוואך נאכט די שמחת החתונה פון די כלה א אייניקל ביי די ברידער כ"ק האדמורי"ם מוויזניץ שליט"א פון וויליאמסבורג און בית שמש.
