אין די יעצטיגע טעג איז באשטעטיגט געווארן אז דעם קומענדיגן שבת קודש פרשת תרומה שבת שקלים, וועט כ"ק אדמו"ר מישועת יעקב סקולען שליט"א פראווענען דעם ערשטן שבת בקרב עדת צאן מרעיתו אין וויליאמסבורג, נאכן איבערנעמען די כתר ההנהגה אין די אלטע נאסטאלגישע סקולענער בית המדרש אויף קיעפ סטריט אין וויליאמסבורג.
ווי באקאנט איז דער רבי שליט"א מיט עטליכע וואכן צוריק געווארן אויפגענומען למלא מקום אבותיו הקדושים, אנצופירן די קהילה קדושה "נצח ישראל" סקולען אויף קיעפ סטריט, באותו מקום וואו די פריערדיגע סקולענע רביים, זיין טאטע, זיידע, און עלטער זיידע, האבן אלע געפראוועט די עבודת הקודש בחיים חיותם, און דארט משפיע געווען פאר די חסידים ברוח ובגשם. אין די לעצטע פאר וואכן האט דער רבי שוין באזוכט עטליכע מאל בבית מדרשו, געדאווענט תפילות און מיטגעהאלטן מעמדי קודש.
אצינד גרייט מען זיך צום גרויסן שבת הכתרה, די ערשטע שבת וואס דער רבי וועט אפרעכטן די תפילות און טישן אויף א געהויבענע פארנעם אינעם עיר ואם בישראל וויליאמסבורג, אין דעם שבתא דריגלא פון שבת שקלים, וואס געפאלט בעצם יום ראש חודש אדר הבא עלינו לטובה. א ספעציעלע וועד הכנסת אורחים ווערט אהערגעשטעלט צו פלאצירן די פילע געסט וואס וועלן קומען מיטהאלטן דעם גרויסן שבת.
