מיט ווינציגער ווי פיר און צוואנציג שעה פארבליבן, ווערן שוין געמאכט די לעצטע צוגרייטונגען צו די גרויסע חתונה בחצרות תולדות אהרן און קרעטשניף, די כלה א טאכטער פון הגה"צ ר' ישראל יוסף קאהן שליט"א בנו הגדול פון כ"ק אדמו"ר מתולדות אהרן שליט"א וראש הכוללים באר יוסף אין ירושלים עיה"ק, מיט די חתן א זון פון הגה"צ ר' איתמר ראזענבוים שליט"א אבד"ק קרעטשניף בני ברק, אייניקל פון כ"ק האדמורי"ם מקרעטשניף און קוסוב וויזניץ שליט"א.
צו קענען אקאמאדירן דעם ריזן ציבור וואס איז ערווארטעט צו מיטהאלטן די גרויסע שמחה בבית צדיקים, איז ארויסגעדינגען געווארן א גיגאנטישע זאל אין די אינדוסטריאלע געגענט הר טוב נעבן בית שמש, וואס ווערט אצינד פראכטפול אהערגעשטעלט כראוי וכיאות לכבוד די גרויסע שמחה. הויכשטאקיגע פארענטשעס און הונדערטער זיץ פלעצער פאר די אינגעלייט און בעלי בתים.
א סוויטע געטרייע עסקנים שטייען על המשמר צו פארזיכערן אלע דעטאלן על צד היותר טוב, אנגעהויבן פון די טעכנישע איינריכטונגען אינעם זאל וואס פעלט זיך אויס ווען עס קומען זיך צונויף אזא גרויסע ציבור, גענויע טראנספארטאציע דעטאלן פון אלע שטעט, אין וואס די טויזענטער חסידים וועלן רייזן מיט די באסעס צום שמחת החתונה.
אין די פארלאפענע טעג איז דער געהויבענער מחותן אבי הכלה הגה"צ ר' ישראל יוסף קאהן שליט"א ארויף לבתי אדמורי"ם ורבנים, צו לאדענען צום שמחה און מקבל זיין ברכת קדשם. צווישן אנדערע איז ער געווען ביים פוסק הדור מרא דארעא קדישא שליט"א, הגה"צ ר' יעקב מאיר שעכטער שליט"א, האדמורי"ם מסלונים, ביאלא, פינסק קארלין, ערלוי, טאלנא, לוצק, הגה"צ ר' יצחק מאיר מארגענשטערן שליט"א אדמו"ר מתורת חכם, הגה"צ המקובל רבי אביש צעהנווירטה שליט"א, און נאך פילע אדמורי"ם ורבנים וגדולי ראשי הישיבות.
היינט מאנטאג ערב די גרויסע חתונה, נעמען זיך צוזאם הונדערטער חסידים אין ביהמ"ד הגדול תולדות אהרן, צו מתפלל זיין און מעורר זיין רחמי שמים פאר די הצלחה פון די ימי השמחה און די בעלי השמחה. מיטוואך נאכט ממחרת החתונה וועט פארקומען א גרויסע פראכטפולע שבע ברכות דורך די הנהלה פון רשת הכוללים באר יוסף, שבת שבע ברכות וועט געפראוועט ווערן בצל הקודש פונעם זיידן כ"ק אדמו"ר מתולדות אהרן שליט"א, זונטאג מיטאג א שבע ברכות דורך די תלמידי הישיבה אין שטאט אלעד, זונטאג נאכט אין ביהמ"ד קרעטשניף בני ברק, און מאנטאג משפטים אין ביהמ"ד קוסוב וויזניץ אין בית שמש.
