אין א ערשטמאליגע שריט איז כ"ק אדמו"ר מבאבוב שליט"א ערשינען היינט בהיכל המתיבתא אין בארא פארק, וואו דער רבי האט משמיע געווען דברות קודש און דברי פרידה פאר די תלמידי המתיבתא, בעפאר דער רבי לאזט זיך ארויס אויף א נסיעה פון צוויי וואכן קיין פלארידע, צו שעפן פרישע כוחות אין די ארטיגע קור-ארט.
דער רבי שליט"א איז אנגעקומען בהיכל המתיבתא אויף תפילת שחרית, און נאכן דאווענען האט דער רבי אויפגעטרעטן מיט א לענגערע שמועס פאר א שעה א האלב, איבער די וויכטיגקייט פון מסורה, און וויאזוי א חסידישע חתונה דארף אויסזעהן מיט היימישע בחורים לומדי תורה.
דער רבי האט ערווענט אז לעצטנס האט זיך אריינגעכאפט פארשידענע פרעמדע מושגים צווישן די היימישע חסידים, פארשידענע שריט וואס ברענגט צו הוללות און פאסט נישט צו ווערן געזעהן ביי חסידישע שמחות, סיי בנוגע התנהגות, שטריימלעך, מוזיק אא"וו, דעריבער דארף מען זייער אכטונג געבן און זיך פירן אין א חסידישע אטמאספער.
דערנאך זענען אלע בחורים אריבער ביים רבי'ן זיך געזעגענען. מארגן אינדערפרי וועט דער רבי דאווענען שחרית אין ביהמ"ד הגדול באבוב, און נאכן דאווענען געזעגענען דעם גאנצן ציבור, און אין די פארמיטאג שעה'ן זיך ארויסלאזן אויפן וועג קיין פלארידע למנוחת הנפש.
