חסידי אלכסנדר תושבי מאנסי וועלן זיך היינט צוזאמנעמען אויף א פרייליכע מאורע פון הרחבת גבולי הקדושה, ווען עס ווערט געעפנט אין א מזל'דיגע שעה די נייע בית החסידים אלכסנדר, תחת דגלו והדרכתו פון כ"ק אדמו"ר מאלכסנדר שליט"א וועלכער איז משפיע מהודו והדרו אויף די חסידים פונדערווייטנס.
א שיינע קבוצה אלכסנדר חסידים וואוינען אין מאנסי, און האבן ביז היינט געדאווענט אין די ווארקא שטיבל וואס איז א צענטערפונקט פאר חסידים ואנשי מעשה פון אלע פוילישע קרייזן, אצינד ווען די צאל אלכסנדר חסידים איז שטארק געשטיגן בליעה"ר, האט מען זיך צוזאמגענומען און מייסד געווען א אייגענע שטיבל, סטאנציאנירט אין א הערליכע לאקאל אויף דזשעפרי פלעיס אין צענטער פון שטאט מאנסי.
היינט אויפדערנאכט קומט פאר די מעמד חנוכת הבית און פתיחת שערים אין די נייע שטיבל, קאמבאנירט מיט א יארצייט סעודה לרגל די יומא דהילולא קדישא פונעם אלטן רבי'ן הרה"ק רבי יחיאל מאלכסנדר זי"ע. א ספעציעלע באגריסונג איז געווארן ארויסגעשטעלט מטעם די צענטראלע אלכסנדר קהילה אין ארץ ישראל צו וואונטשן די חסידים פון מאנסי לכבוד די גרויסע דערגרייכונג.
