היינט איז באשטעטיגט געווארן אז כ"ק אדמו"ר מטשערנאביל שליט"א וועט פראווענען א געהויבענע שבת אינעם בליענדן עיר התורה והחסידות לעיקוואד, און מופיע זיין בשערי העיר צו משפיע זיין פאר די חסידים תושבי העיר, ליהנות ולהתחמם ביי די תפילות און טישן בצל הקודש.
דער רבי שליט"א וועלכער פארט נישט געווענליך ארום פירן שבתים אין אנדערע שטעט, בלויז איינמאל א יאר קיין מאנסי בבית מדרשו, וועט אצינד אונטערנעמען דעם געהויבענעם באזוך קיין לעיקוואד מיטן ציהל צו אויפטרייבן גרויסע געלטער פאראויסצושטופן די מאסיווע בוי פראיעקט, ביים הערליכן נייעם בית המדרש הגדול פאר חסידי טשערנאביל אין בארא פארק, וואס בויעט זיך לשם ולתפארת אין די יעצטיגע תקופה.
דער רבי וועט מופיע זיין בשערי העיר לעיקוואד קומענדיגע וואך פרשת משפטים, און פראווענען א געהויבענע שבת אין שטאט, נאך גאנצע פופצן יאר וואס דער רבי האט נישט געפראוועט א שבת דארט אין לעיקוואד. די תפילות און טישן וועלן געפראוועט ווערן אינעם גרויסן היכל בית המדרש דקהל נועם אליעזר סקולען, אין די צייט וואס כ"ק אדמו"ר מסקולען שליט"א פון לעיקוואד וועט זיין צוגאסט אין טאראנטא אויף א ביקור חיזוק בקרב חסידיו.
פילע חסידים פון איבעראל זענען ערווארטעט צו קומען מיטהאלטן דעם גרויסן שבת, און א ספעציעלע סוויטע עסקנים ארבעטן די טעג איבער די גענויע דעטאלן, און אהערשטעלן ברייטע הכנסת אורחים פאר די פילע געסט וואס זענען ערווארטעט, צו קומען מיטהאלטן די געהויבענע תפילות און טישן בזמן שהצדיק בעיר.
דער רבי וועט זיין צוגאסט אין לעיקוואד עטליכע טעג, און ארויפגיין לבתי נגידים ושועים אויפצוטרייבן שטיצע פאר די קרן הבנין פון די נייע בית המדרש, אזוי אויך וועט דער רבי באזוכן די אדמור"י ורבני העיר, און אויפנעמען דעם ציבור חסידים תושבי העיר לחיזוק ולהדרכה.
