מטעם ק"ק באבוב – 45 איז היינט געמאלדן געווארן אז כ"ק אדמו"ר מבאבוב – 45 שליט"א וועט זיך ארויסלאזן אויף א ספעציעלע נסיעה קיין פוילן מתפלל צו זיין אין עיר אבותיו הקדושים 'צאנז', און פוקד זיין דעם ציון הק' פון הייליגן צאנז'ער רב זי"ע בעצם יומא דהילולא קדישא כ"ה ניסן, וועלכע געפאלט היי יאר מיטוואך פרשת שמיני.
עס וועט זיין דאס ערשטע מאל נאך אן אפשניט פון 10 יאר וואס דער רבי שליט"א וועט זיך ארויסלאזן אויף א נסיעה קיין פוילן אינאיינעם מיטן ציבור פון הונדערטער חסידים ואנשי מעשה מכל מקומות מושבותיהם.
לויט די יעצטיגע פלענער וועט די קהילה פארזארגן א ספעציעלער טשארטער פליגער קיין פוילן צוגעשטעלט דורך די ללכת פירמע, פאר אלע חסידים וואס ווילן מיטהאלטן די געהויבענע יומא דהילולא קדישא בראשות דעם רבי'ן שליט"א אין צאנז.
נאכן פוקד זיין דעם ציון הק', וועט דער רבי פראווען שלחנו הטהור די סעודת הילולא אין א גרויסן שאטער אין די שטאט צאנז.
די גענויע דעטאלן פון די נסיעה ווערן אצינד אויסגעארבייט דורך די עסקני הקהילה, און די פרטי הנסיעה וועלן בעז"ה ערשיינען אין די קומענדיגע טעג.
