אין די יעצטיגע טעג איז באשטעטיגט געווארן די פלענער איבער א גרויסארטיגע מסע הקודש וואס כ"ק אדמו"ר מוויזניץ שליט"א פון לאנדאן נעמט אונטער קיין פוילין, אינאיינעם מיט א געקליבענע צאל נגידים ותומכי המוסדות, וואס האבן זיך אנגערופן מיט גרויסע סכומים אוועקצושטעלן די בניני הישיבה הקדושה בית ישראל דחסידי וויזניץ אין לאנדאן.
ווי באקאנט איז דער רבי שליט"א אריינגעשפרינגען אין א פראיעקט אינאיינעם מיט די הנהלת המוסדות, אפצוקויפן א גיגאנטישע געביידע אין ענפיעלד ענגלאנד, וואו צו סטאנציאנירן דעם רבינ'ס ישיבה גדולה "בית ישראל", וואו צענדליגע בחורים ווערן נתחנך בדרך התורה והחסידות, און גענוי ווי זיין פאטער דער רבי זצ"ל, האט דער רבי שליט"א געוואלט ארויספירן די ישיבה מחוץ לעיר צו קענען לערנען מיט הרחבת הדעת ווייט פון די שטאטישע גאסן.
אין די לעצטע צוויי יאר איז דורכגעפירט געווארן א סעריע געלט אקציעס אויפצוטרייבן די נויטיגע פאנדן און אהערשטעלן דעם בנין פאר די תלמידי הישיבה, און פאר די תומכים פון צען טויזענט דאללער און העכער האט דער רבי געמאלדן אז ער וועט ארויספארן מיט זיי אויף א ספעציעלע נסיעה לאות הוקרה פאר זייער הילף אוועקצושטעלן די בנין הישיבה.
אצינד איז באשטעטיגט געווארן אז די נסיעה וועט פארקומען קומענדיגן חודש ניסן, תיכף נאך יום טוב פסח, ווען דער רבי שליט"א וועט ארויספארן צום שטאט ליזענסק אין פוילין, מקום מנוחת הקודש פונעם הייליגן רבי'ן ר' אלימלך זי"ע, און דארט פראווענען א גרויסע שבת אינאיינעם מיט ארום צוויי הונדערט נדיבי לב, סיי פון אייראפע און סיי פון אמעריקע, עס וועט פארקומען שבת קודש פרשת שמיני מברכים חודש אייר הבא עלינו לטובה.
