זעלטן היסטארישע נייעס ווערט באקאנט די טעג, אז די הייליגע ספר תורה וואס געפונט זיך באוצרו הטוב פון כ"ק אדמו"ר ממאחנובקא בעלזא שליט"א, מעזבונו וירושתו פונעם אור שבעת הימים דער הייליגער בעל שם טוב הק' זי"ע, וועט אין א ערשטמאליגע שריט געברענגט ווערן קיין ניו יארק, בשליחות הקודש פונעם אייגענטומער כ"ק אדמו"ר ממאחנובקא בעלזא שליט"א.
די ספר תורה האט דער רבי שליט"א ערהאלטן בירושה פון זיין פעטער הרה"ק רבי אברהם יהושע העשיל ממאחנובקא זי"ע, וועלכער האט דאס באקומען פון זיין פאטער הרה"ק רבי יוסף מאיר ממאחנובקא זי"ע. ווייטער ארויף איז עס אריבער בירושה פון זיין פאטער הרה"ק רבי אברהם יהושע העשיל מסקווירא זי"ע, פון זיין פאטער הרה"ק רבי איציקל מסקווירא זי"ע, פון זיין שווער הרה"ק רבי הערשעלע מסקווירא זי"ע, פון זיין פאטער הרה"ק רבי אהרן מטיטיוב זי"ע, פון זיין פאטער הרה"ק רבי צבי זי"ע, פון זיין פאטער דער אור שבעת הימים דער הייליגער בעל שם טוב זי"ע.
דער רבי שליט"א היט אפ דעם ספר תורה אויף א זעלטענע פארנעם, און בלויז דער רבי זעלבסט טראגט דעם שליסל פונעם ארון הקודש, ווען אין ספעציעלע זמנים נעמט עס דער רבי ארויס צו ליינען דערין. אצינד וועט דער רבי אין א ערשטמאליגע שריט עס שיקן קיין ניו יארק, נאך וואס כ"ק אדמו"ר מסקווירא שליט"א וועלכער איז ווי באקאנט א גאר נאנטע קרוב מיטן רבי'ן, האט געבעטן דעם רבי'ן פערזענליך צו שיקן די ספר תורה צום גרויסן מעמד הכנסת ספר תורה וואס קומט פאר אין צוויי וואכן ארום בחצר הקודש סקווירא.
לויטן יעצטיגן פלאן וועט דער רבי זעלבסט נישט ארויספארן קיין ניו יארק, נאר שיקן דעם ספר תורה מיט פערזענליכע שליחים, און אויפן רבינ'ס פארלאנג וועלן די שליחים זיך איינטיילן דורכאויס דעם לאנגן וועג צו האלטן די ספר תורה, עס זאל ניטאמאל פאר איין סעקונדע ווערן אראפגעלייגט פון מענטשליכע הענט.
