ביים עריכת שולחן הטהור לכבוד חמשה עשר בשבט נעכטן מיטוואך אויפדערנאכט אין ביהמ"ד הגדול אין קרית יואל, האט כ"ק אדמו"ר מסאטמאר שליט"א פראקלאמירט א פרישע אונטערנעמונג אין צוזאמענארבעט מיט טעטיגע עסקנים און קליידער סוחרים, מיטן ציהל צוצושטעלן חסידישע קליידער וואס איז געקנעפלט רעכטס אויף לינקס, ווי עס איז געווען אנגענומען ביי חסידישע אידן אין אלע דורות.
דער רבי שליט"א האט ארומגערעדט ביי די דברי תורה איבער די וויכטיגקייט פון גיין אנגעטון מיטן חסידישן לבוש, דער רבי האט זיך אויסגעדרוקט מיט באדויער אז טראץ וואס מען האט זיך געפירט ביי חסידישע אידן צו גיין געקנעפלט רעכטס אויף לינקס, האט ער לעצטנס באמערקט אז די קינדערלעך גייען נישט אזוי, און ווען ער האט געפרעגט דערוועגן, האט מען געענטפערט אז עס איז פשוט נישטא צו באקומען העמדער פאר אינגלעך וואס איז געקנעפלט רעכטס אויף לינקס.
דער רבי האט ערווענט אז ער האט געלאזט רופן עסקנים און קליידער סוחרים, און באאויפטראגט איבער דעם פרישן פראיעקט צו ערצייגן חסידישע קליידער וואס איז געקנעפלט רעכטס אויף לינקס, כדי אז די פרחי החסידים זאלן קענען גיין מיט די אנגענומענע חסידישע לבוש, דערביי האט דער רבי געמאלדן אז צום בעפארשטייענדן יום טוב פסח בעז"ה וועט מען שוין קענען קויפן די נייע העמעדער פאר די ילדי חן.
