נאך לאנגע יארן וואס די תלמידים פון ישיבה קטנה אמרי חיים וויזניץ אין בארא פארק האבן נישט געהאט קיין פולשטענדיגע אייגענע אכסניא, גרייטן זיך אצינד די תלמידים צו באנייען א אייגענע בנין, א הערליכע בנין מפואר וואס איז געבויעט געווארן פאר די ישיבה אין די לעצטע צוויי יאר.
די ישיבה וואס איז געגרינדעט געווארן מיט אכט און צוואנציג יאר צוריק, איז אין די ערשטע יארן געווען סטאנציאנירט אין די בנין התלמוד תורה אויף די דריי און פופציגסטע סטריט, און שפעטער אין די בנין בית המדרש דקהל תורת חיים וויזניץ אויף נוא יוטרעקט, ווען די וויכטיגקייט זיך צו איינקוואטירן אין א אייגענע בנין האט ארויסגעשריגן פון אלע זייטן.
מיט עטליכע יאר צוריק איז די הנהלת הישיבה אריינגעשפרינגען אין א מאסיוון פראיעקט צו מרחיב זיין די גבולי הקדושה, מען האט אפגעקויפט א שטח אויף די זעכציגסטע סטריט אין בארא פארק, און דארט אויפגעבויעט א הערליכע בנין מפואר "בנין לעבאוויטש", בנדבת לבו הטוב פון הנגיד החסיד ר' בנציון לעבאוויטש הי"ו מגדולי תומכי מוסדות וויזניץ אין בארא פארק, לזכר נשמת אביו הרב החסיד ר' יחיאל לעבאוויטש ע"ה איש אמונו פון הרה"ק בעל תורת מרדכי מוויזניץ זצ"ל.
אצינד נאך א קנאפע יאר פון העפטיגע בוי ארבעט איז די בנין הישיבה געווארן צוגעגרייט אריינצונעמען די תלמידי הישיבה אין זייער נייעם אכסניא של תורה, און מארגן זונטאג וועט מען אין א מזל'דיגע שעה מחנך זיין דעם נייעם בנין וואס וועט צוברענגען גרויס הרחבת הדעת פאר אלע תלמידים.
מארגן זונטאג וועט דער נשיא הישיבה כ"ק אדמו"ר מוויזניץ שליט"א פון בארא פארק אנקומען אויף תפילת מנחה בהיכל הישיבה, די ערשטע תפילה אין דעם נייעם אכסניא של תורה ותפילה. דערנאך וועט פארקומען א מעמד קביעת מזוזה און מסיבת לחיים, נאכגעפאלגט מיט א סדר לימוד שעות רצופות ווען די תלמידי הישיבה אינאיינעם מיטן רבי'ן שליט"א וועלן מחנך זיין דעם בנין מיטן אור התורה.
א גרעסערע מעמד חנוכת הבית ווערט געפלאנט אין די נאנטע חדשים, קאמבאנירט מיט א מעמד הכנסת ספר תורה וואס דער חשובער נדיב ר' בנציון גיבט אריין צום היכל הישיבה, לעילוי נשמת אביו הרב החסיד ר' יחיאל לעבאוויטש ע"ה.
