מיט בלויז אכט און פערציג שעה פארבליבן ווערן שוין געמאכט די לעצטע הכנות צום גרויסארטיגן מעמד ועידת "יחידי סגולה", וואו עס וועלן זיך צוזאמנעמען א געקליבענע צאל נגידים ותומכים וואס שטייען צו די רעכטע האנט, לימין הקודש פון כ"ק אדמו"ר מראחמיסטריווקא שליט"א, און העלפן דעם רבי'ן טראגן דעם שווערן עול פון החזקת המוסדות אויף א שטארקע פארנעם.
ווי באריכטעט גרייט זיך דער רבי שליט"א ארויסצוקומען מעבר לים אויף א בליץ נסיעה פון בלויז איין טאג, מיטן איינציגן ציהל צו משפיע זיין פאר די יחידי סגולה, פארברענגען אינאיינעם און ממשיך זיין שפע ברכה רב וכל טוב, אוועקשטעלן א שטארקע התקשרות מיט די חשובע תומכים וואס העלפן דעם רבי'ן טראגן דעם שווערן לאסט.
די פראכטפולע מעמד "ועידת יחידי סגולה" וועט פארקומען דעם דינסטאג אויפדערנאכט בליל כ"א שבט, אין די פראכטפולע ארמון האטעל אין סטעמפארד קאנעקטיקוט, די בארימטע וויי עף פראדאקשען פירמע, אין שפיץ פונעם טעטיגן עסקן ר' יוחי פליישמאן הי"ו, זענען פארנומען אצינד מיט אלע לאגיסטישע דעטאלן אויסצוארבעטן דעם גאנצן מעמד מיט אלעס ארום על צד היותר טוב.
