מיט פייערליכע הרגשים גרייטן זיך המוני תלמידי קאַשוי פון אַלע יאָרן, צו די היסטאָרישע "כינוס אהבת תלמידים" דעם קומענדיגן זונטאָג פּר' תרומה הבעל"ט, וואָס וועט צוזאַמנעמען אַלע תלמידים רבות בשנים סיי די עלטערע דורות וואָס האָבן נאָך זוכה געווען צו לערנען בהלו נרו על ראשינו ביי כ"ק מרן בעל ברכת שמים מקאַשוי זי"ע, און סיי די אברכים יוצאי 'ישיבת אהל רפאל קאַשוי'. דער כינוס אדיר וועט פאָרקומען אויף אַ גראַנדיעזע פאַרנעם אינעם גיגאַנטישן "דאגגעל גרינהאַוז פּלאַזאַ" אין די ברוקלין נעווי יאַרד, במקהלות תלמידי וחסידי קאַשוי רבנן ותלמידיהון, אין שפּיץ פון כ"ק אדמו"ר מקאַשוי שליט"א.

אַ גאָר רייכער סדר המעמד ווערט אַצינד אַרויסגעשטעלט צום ציבור האלפים, מיט אַ ריי דעטאַלן וואָס עס נעמט אַריין איבער די הכנות צום מעמד, די טראַנספּאָרטאַציע פון אַלע געגנטער, די בעלי דרשנים, און די הערליכע מתנות און הכרת הטוב וואָס וועט געשאָנקען ווערן ביים מעמד.

פון די הויפּט צענטער-פּונקטן ביים היסטאָרישן כינוס, איז הויפּטזעכליך דער ערשטמאָליגער דראַמאַטישע פּרעזענטאַציע, דער נאָסטאַלגישער עקזיביט "בקודש חזיתיך" וואָס וועט אויף אַ זעלטענע שטייגער אַראָפּשפּילן די אומגלויבליכע רייזע פון קאַשוי אינדערהיים ביז'ן היינטיגן טאָג, וואָס דער אדם גדול בענקים, כ"ק הגה"ק מקאשוי זי"ע האָט דורכגעשפּרייזט זיין הייליגע לעבנסגעשיכטע אָנגעהויבן אינדערהיים בעפאָר די ביטערע חורבן, און אַריבער צו די איבערפלאַנצונג אין אַמעריקע מיט זיין זעלטענע הרבצת תורה און אומבויגזאַמע אידישקייט למען קיום היהדות.

די גאָר רייכע עקזיביט אויסשטעל פּרעזענטאַציע וועט צוריקנעמען די באַטייליגטע צו די היסטאָרישע מאָמענטן אין די "עשר מסעות" פונעם רבי'ן זי"ע פון קאַשוי אינדערהיים ביז די הרבצת תורה אין ישיבת אהל שמואל אין בעדפאָרד הילס, אַראָפּגעשפּילט מיט לעבעדיגע אויסשטעלונגען און אויגפאַרכאַפּנדע מעדאַלן, איבער די אַלע איבערלעבענישן צווישן די ערשטע דעסטינאַציע ביז'ן לעצטע מעכטיגע הרבצת תורה וואָס איז פאָרגעקומען לאַנגע יאָרן אין די באַרימטע בעדפאָרד הילס שטעטל.

דער ציבור וועט דאָס מיטלעבן ערשטמאָליג מיט בילדער און רעקאָרדירונגען, אילוסטראַציעס פון בניני בית קאַשוי, באַגלייט זייט ביי זייט מיט היסטאָרישע דאָקומענטן און חפצי צדיק וואָס ווערט צום ערשטן מאָל אַרויסגעלייגט צום ציבור הגדול.

ווי די עסקני הכינוס גיבן איבער, וועט דער איינמאָליגער אומפאַרפּאַסבאַרער פּרעזענטאַציע פאָרקומען בלויז אינעם ערשטן שעה פונעם מעמד אדיר, פון 6:15 ביז 7:15 פּונקטליך, כדי נישט צו שטערן די פלוס פונעם מעמד. דער ציבור וועט זיכער מאַכן צו ערשיינען אין צייט צו קענען מיטהאַלטן די נאָסטאַלגישע אויסשטעלונג וועלכע וועט פארבליין איינגעקירצט אויף לאַנגע יאָרן ביי אַלע באַטייליגטע.