יהדות ניו יארק טוט היינט מקבל זיין בהדרת כבוד דעם חשובן גאסט פון ארץ הקודש, כ"ק אדמו"ר מראחמיסטריווקא שליט"א, וועלכער ערשיינט בשערי ניו יארק אויפצוטרייבן שטיצע פאר די מוסדות הקדושים, און באשיינען די גייסטרייכע מעמד "ועידת המייסדים – יחידי סגולה", געאייגענט פאר די יחידי סגולה תומכים ונדיבים וואס העלפן דעם רבי'ן טראגן דעם שווערן עול פון החזקת תורה ולומדיה.
ווי באריכטעט וועט די גרויסע מעמד פארקומען אין די פראכטפולע ארמון האטעל אין סטעמפארד קאנעקטיקוט, וואו עס גייט אן אצינד אקטיווע הכנות אהערצושטעלן אלע דעטאלן אויפן טאקט, אונטער די געניטע פירערשאפט פון די וויי עף פראדאקשענס פירמע, אין שפיץ פון העסקן הנמרץ ר' יוחי פליישמאן הי"ו.
היינט אינדערפרי האט דעם רבינ'ס פליגער געלאנדעט אין ניו יארק, דער רבי איז באלד צוגעפארן צום ארמון האטעל אין קאנעקטיקוט, דארט געדאווענט שחרית און עולה געווען לתורה.
