מטעם בית כ"ק אדמו"ר מראחמיסטריווקא שליט"א פון ספרינג וואלי איז געמאלדן געווארן, אז דער רבי שליט"א וועט זיצן שבעה בבית מדרשו אין מאנסי ביז מארגן מיטוואך נאכמיטאג, ווען דער רבי שליט"א וועט ארויספארן קיין ארץ ישראל צו זיצן שבעה אינאיינעם מיט די בני המשפחה, אין שטוב פון אמו של מלכות הרבנית תליט"א.
ווי באריכטעט איז נעכטן נפטר געווארן א שוועסטער פונעם רבי'ן, מרת פיגא יענטא טווערסקי ע"ה, וועלכער איז ליידער נישט געזונט געווען אלע יארן. די לוויה איז פארגעקומען אין ארץ ישראל, אנגעהויבן ביים בית הלוויות שמגר אין ירושלים, און דערנאך אויפן הר הזיתים וואו זי איז געקומען לקבורה סמוך ונראה צו די קברי אבות, צדיקי בית ראחמיסטריווקא זי"ע.
דער רבי שליט"א זיצט שבעה אין די ווייבער שוהל אין ראחמיסטריווקא בית המדרש אויף ווארען קאורט אין מאנסי, אנגעהויבן פון נעכטן מאנטאג נאכמיטאג, דורכאויס די טאג היינט דינסטאג, און מארגן מיטוואך פארמיטאג. שחרית איז אכט דרייסיג, מנחה פיר דרייסיג, און מעריב זיבן אזייגער. זמני ניחום אבלים איז פון 11:30 פארמיטאג ביז צוויי אזייגער מיטאג, צווישן מנחה און מעריב, און פון אכט דרייסיג ביז עלף אזייגער ביינאכט.
מיטוואך נאכמיטאג וועט דער רבי ארויספארן קיין ארץ ישראל, און זיצן שבעה ביז נאך שבת אין שטוב פון אמו הרבנית תליט"א. דארט אין ארץ ישראל זיצן שבעה די אנדערע בני המשפחה, אמו הרבנית תליט"א, די ברידער הרב לוי טווערסקי שליט"א, הרב יוחנן, הרב פנחס אהרן, הרב חנינא ליפא, און הרב מרדכי יהושע שליט"א. די שוועסטער הרבנית מזוועהיל תליט"א, אשת חבר כ"ק אדמו"ר מזוועהיל שליט"א, אשת הגה"צ ר' אהרן טווערסקי שליט"א אב"ד טשערנאביל ירושלים בן כ"ק אדמו"ר מטשערנאביל שליט"א, אשת הרב חיים יעקב שניאורסאן שליט"א, און אשת הרב יצחק שמואל לעמבערגער שליט"א.
נעכטן מאנטאג זענען געווען מנחם אבל זיין ביים רבי'ן פילע אדמורי"ם ורבנים, צווישן זיי די פעטערס כ"ק אדמו"ר מראחמיסטריווקא שליט"א, כ"ק אדמו"ר מראחמיסטריווקא שליט"א פון לעיקוואד, כ"ק אדמו"ר מוויזניץ שליט"א פון וויליאמסבורג, און כ"ק אדמו"ר מוויזניץ שליט"א פון בית שמש.
