אפדעיט מאנטאג 4:40 נאכמיטאג
גינסטיגע נייעס הערט מען יעצט פון לאס אנדזשעלעס, ווען די דאקטוירים זענען ארויסגעקומען מעלדן פאר די בני המשפחה און מקורבים אז די אפעראציע האט זיך ב"ה געשלאסן מיט הצלחה, און זיי זענען צופרידן פון די אנטוויקלונגען, אין די צייט וואס אידישע קינדער זענען ווייטער מתפלל לרפואתו השלימה פונעם רבי'ן.
אפדעיט מאנטאג 3:30 נאכמיטאג
ווי עס ווערט איבערגעגעבן פון די שפיטאל ווענט אין לאס אנדזשעלעס, האלט מען נאך אינמיטן די אפעראציע אין די צייט וואס כלל ישראל בכל מקומות מושבותיהם טוען ווייטער איינרייסן ביים בורא עולם פארן רבינ'ס געזונט.
די דאקטוירים זענען ארויסגעקומען אין די לעצטע מינוטן צו געבן א באריכט פאר די בני המשפחה און מקורבים, זאגענדיג אז מען מאכט פארשריט ב"ה און די אפעראציע גייט פאראויס ווי געפלאנט, און מיטן אויבערשטנס הילף וועט מען ענדיגן די אפעראציע אין די נאנטע שעות מיט גרויס הצלחה ב"ה.
-------
צענדליגע טויזענטער אידן איבער דער גארער וועלט זענען איינגעהילט אין די יעצטיגע שעות אין התעוררות'דיגע מעמדי תפילות ותחנונים, אין די צייט וואס אחד מגדולי האדמורי"ם כ"ק אדמו"ר מוויזניץ שליט"א גייט אריבער א קאמפליצירטע אפעראציע אינעם ווייטן לאס אנדזשעלעס, מיטן האפענונג צו קענען היילן דעם רבי'ן פון די ביטערע מחלה ה"י, דער רבי זאל צוריקקומען צו די כוחות ווי אמאל און ווייטער קענען משפיע זיין פאר עדת צאן מרעיתו וכל בית ישראל.
מטעם בית דין צדק אין שיכון וויזניץ בני ברק איז באשטימט געווארן אויף היינט מאנטאג א יום תפילה ותענית, ווען אלע חסידים פאסטן א האלבע טאג און מען טוט זיך צוזאמקומען אין די בתי מדרשים און מקומות הקדושים ברוב עם אויסצוזאגן ספר תהלים און מעתיר זיין לרפואתו השלימה פונעם רבי'ן, כ"ק מרן ישראל בן לאה אסתר בתוך שאר חולי ישראל, והן קל כביר לא ימאס תפילת הרבים.
פילע קהילות קדושות און רעבישע הויפן איבער די וועלט האבן ארויסגעשטעלט מודעות מיט א הייסע רוף צו די חסידים און חברי הקהילה אויסצונוצן דעם טאג לתפילה ותחנונים צו מעתיר זיין בתפילה פארן געזונט פונעם וויזניצער רבי'ן שליט"א, השם יאריך ימיו ושנותיו בטוב ובנעימים.
צווישן די פילע הויפן וואס האבן ארויסגעשטעלט מודעות ציילן זיך חצרות הקודש סקווירא, בעלזא, צאנז, באבוב, באבוב 45, תולדות אהרן, וויזניץ מאנסי, וויזניץ וומס"ב, ראחמיסטריווקא, טשערנאביל, סערט וויזניץ, צאנז קלויזענבורג, סאדיגורא, און שאץ וויזניץ.
היינט אינדערפרי האט הגה"צ המשפיע ר' אלימלך בידערמאן שליט"א אויפגעטרעטן מיט א ספעציעלע דרשת חיזוק והתעוררות פאר כלל חסידי וויזניץ בכל מקומות מושבותיהם, אויסצונוצן דעם טאג לתשובה ותיקון המעשים לרפואתו השלימה פונעם רבי'ן, אזוי אויך זענען א גרופע חסידים ארויסגעפארן אויף א תפילת רבים ביים ציון הק' פון התנא האלקי רבי שמעון בר יוחאי אין אתרא קדישא מירון.
