שטייענדיג ווייניגער ווי א וואך בעפאר די יומא דהילולא קדישא פון כ"ק אדמו"ר מסקולען זצ"ל בעל מאור ישראל, איז באשטעטיגט געווארן אז די צענטראלע יארצייט טיש אין שפיץ פון בניו ונכדיו ממשיכי דרכו כ"ק מרנן האדמורי"ם שליט"א, וועט געפראוועט ווערן אין די נארוואס באנייעטע ביהמ"ד הגדול "מאור ישראל" סקולען אין עיר ואם בישראל וויליאמסבורג, בית מדרשו פונעם עלטסטן סקולענער רבי היינטיגע טעג, כ"ק אדמו"ר מסקולען שליט"א פון וויליאמסבורג.
אין לויף פון די לעצטע זעקס יאר זינט די הסתלקות פונעם רבי'ן זצ"ל כ"ה אדר ב' תשע"ט, איז די צענטראלע יארצייט טיש געווארן אפגעראכטן אויף א פאראייניגטע פארנעם אין שפיץ פון די ברידער כ"ק מרנן האדמורי"ם, אין עטליכע לאקאציעס אין שטאט בארא פארק, מקום מושבו פונעם עלטסטן ברודער כ"ק אדמו"ר מסקולען זצ"ל בעל ישועת יעקב. אצינד שטייענדיג נאכן הסתלקות פונעם רבי'ן זצ"ל דער גדול האחים, האבן אלע רבי'ס אינאיינעם מיט די עסקני הקהילות באשטעטיגט אז די צענטראלע יארצייט טיש וועט ווידער פארקומען אויף א פאראייניגטע פארנעם, דאסמאל אין שטאט וויליאמסבורג בצל הקודש פונעם עלטסטן ברודער בחיים היינט צוטאגס, כ"ק אדמו"ר מסקולען שליט"א פון וויליאמסבורג.
די יארצייט טיש וועט פארקומען מאנטאג פרשת פקודי אויפדערנאכט בליל ההילולא קדישא, ווען אויפן בימת הכבוד וועלן באשיינען און מעריך זיין דעם שולחן הטהור די ברידער האדמורי"ם פון וויליאמסבורג, מאנסי, און לעיקוואד, די דריי קינדער פונעם בעל ההילולא וואס וואוינען דא אין ניו יארק, אינאיינעם מיט די צוויי אייניקלעך וואס זענען שוין היינט משמש באדמורו"ת, האחים האדמורי"ם מסקולען און ישועת יעקב סקולען.
