מטעם קהל יטב לב ד'סאטמאר ווערט געמאלדן איבער א פרישע דורכברוך צו ארויפארבעטן די כח הפרנסה אינערהאלב די חברי הקהילה, ווען אין צוויי חדשים ארום וועט פארקומען א ערשטמאליגע סאטמארע ביזנעס מארק וואס וועט צונויפברענגען הונדערטער ביזנעסלייט תלמידי וחסידי סאטמאר, און מקיים זיין דעם וחי אחיך עמך.
ווי באקאנט האט די קהילה אוועקגעשטעלט דעם מפעל "עסק" ארויפצוארבעטן די כח הפרנסה ביי די חסידים, און באגלייטן די אינגעלייט צו מצליח זיין אין גאלדענע ביזנעסער מיט פארשידענע וועגן, א פארנעם וואס האט שטארק מצליח געווען ב"ה און שוין פאקטיש געברענגט פרישע רעזולטאטן.
אצינד גייט מען א טריט פאראויס מיטן אהערשטעלן א ערשטמאליגע ביזנעס עקספאו וואס וועט צונויפברענגען הונדערטער ביזנעסלייט תלמידי וחסידי סאטמאר, אונטערן נאמען "סאטמארע ביזנעס מארק - סאטמארק". א דאטום איז באשטימט געווארן אויף קומענדיגן דאנערשטאג פרשת בהר בחוקותי, כ"ד אייר, און די צוויי און צוואנציגסטע אין מאי למספרם, וואס אין דעם טאג וועט די סאטמארע עקאנאמיע שפרודלען ווי קיינמאל בעפאר.
אהערצושטעלן די טעכנישע דעטאלן ארום דעם ערשטמאליגן ביזנעס קאנווענשן, איז איינגעשפאנט געווארן דער טאלאנטפולער ארגאנאזירער הרב החסיד ר' שמואל שטערן הי"ו פון קאמפוס, וועלכער האט שוין א לאנגיעריגע קאריערע אין אהערשטעלן מייסטערהאפטיגע סעמינארן און געלונגענע גיגאנטישע אווענט'ס אינערהאלב די חסידישע געמיינדע אין ניו יארק.
