א אינטערסאנטע געשיכטע ווערט באקאנט די טעג, אז די גרויסע קאלאמביע יוניווערסיטעט אין אמעריקע האט געשיקט בעטן הילף ביי כ"ק אדמו"ר מסקווירא שליט"א, נאך וואס דער אמעריקאנער פרעזידענט דאנאלד טראמפ האט פארפרוירן מיליאנען דאללארן אין הילפס געלטער פאר די יוניווערסיטעט צוליב אנטיסעמיטישע באוועגונגען אין די יוניווערסיטעט.
די געשיכטע איז דערציילט געווארן דורך דעם רבינ'ס יונגסטע זון הגה"צ ר' חיים מאיר טווערסקי שליט"א, ביים גרויסן מעמד בריש גלי וואס איז פארגעקומען דעם דאנערשטאג נאכט אין ביהמ"ד הגדול אין סקווירא שטעטל, מחזק צו זיין דעם לימוד אין ספרי חסידות. דערביי האט ר' חיים מאיר דערציילט אז ער האט באקומען א ווענדונג פון א גרויסע אמעריקאנער יוניווערסיטעט אז ער זאל איבערגעבן פאר אביו הגדול דער רבי שליט"א, און בעטן אויב ער קען אויסנוצן זיינע פאליטישע קאנעקשאנס ארויסצוהעלפן די קריזיס וואס האט באטראפן די יוניווערסיטעט מיטן פרישן פארארדענונג פון פרעזידענט טראמפ, זאגענדיג אז דער סקווירא רבי האט דאך פאליטישע קשרים סיי אינעם רעפאבליקאנער לאגער, און סיי אינעם דעמאקראטישן לאגער.
ווי ר' חיים מאיר דערציילט, איז ער אריין אל הקודש פנימה צו זיין גרויסן טאטן דער רבי שליט"א און פארגעשלאגן די ווענדונג פון די קאלאמביע יוניווערסיטעט, דער רבי האט זיך אינטערסירט אין די קלארע דעטאלן פארוואס דער פרעזידענט האט פארפרוירן די הילפס געלטער, און מען האט אויפגעברענגט די פאקט אז עס טוט זיך ליידער העסליכע אנטיסעמיטישע באוועגונגען אינערהאלב די יוניווערסיטעט, וואס טוט באדראען אידישע סטודענטן אויף א טאג טעגליכע פארנעם.
דער רבי שליט"א האט דערביי קלארגעשטעלט אז ער קען אויסנוצן זיינע פאליטישע קשרים ארויסצוהעלפן אין צייט פון נויט, אבער בלויז נאך וואס עס איז זיכער אז אידישע קינדער וועלן נישט געטשעפעט ווערן דארט, און נישט זיין א ציהל ברעט פאר פאליטישע אגענדעס וואס ברויזן אויף די לאקאלע גאסן.
