מארגן מיטוואך וועט כ"ק אדמו"ר מוויזניץ שליט"א פון בית שמש אנקומען אויף א בליץ באזוך פון עטליכע שעה קיין לאס אנדזשעלעס, צו מבקר חולה זיין ביי חותנו הגדול כ"ק אדמו"ר מוויזניץ שליט"א וועלכער געפונט זיך די טעג אין שפיטאל אין לאס אנדזשעלעס, נאכן אריבערגיין א קאמליצירטע אפעראציע ווי באקאנט, וואס איז ב"ה געקרוינט געווארן מיט הצלחה.
דער וויזניצער רבי פון בית שמש איז די וואך אנגעקומען צוגאסט קיין ניו יארק, לקראת די יומא דהילולא קדישא פון אביו הגדול הרה"ק בעל תורת מרדכי מוויזניץ זי"ע וואס געפאלט דעם שבת קודש כ"ט אדר, ווען די ברידער מרנן האדמורי"ם לבית וויזניץ וועלן צוזאמען פראווענען דעם שבת יארצייט אין ביהמ"ד הגדול וויזניץ אין מאנסי.
היינט דינסטאג איז דער רבי אנגעקומען קיין לעיקוואד, צו באשיינען די שמחת החתונה ביי איינער פון די תומכי המוסדות, און מארגן צופרי וועט זיך דער רבי ארויסלאזן אויף א בליץ נסיעה פון עטליכע שעה קיין לאס אנדזשעלעס, און מבקר חולה זיין ביים שווער כ"ק אדמו"ר מוויזניץ שליט"א לרפואה שלימה, און זיך דערנאך אומקערן צוריק קיין ניו יארק ביז איבער שבת.
פון שפיטאל אין לאס אנדזשעלעס הערט מען ב"ה פאזיטיווע גריסן, אז דער וויזניצער רבי ערהוילט זיך נאך די שווערע אפעראציע, און די דאקטוירים זענען צופרידן העכער ווי ערווארטעט, זאגענדיג אז די שאנסן אז דער רבי זאל זיך ערהוילן פון די ביטערע מחלה ה"י זענען גאר הויעך, און אידישע קינדער זאלן ווייטער מתפלל זיין אז אלעס זאל גיין כשורה, כ"ק מרן ישראל בן לאה אסתר זאל האבן א רפואה שלימה בקרוב, און קענען צוריקפארן אהיים קיין ארץ ישראל צו ווייטער משפיע זיין לכל הקהל הקודש.
