תלמידי וחסידי טאהש נעמען אויף מיט פרייד די איבערראשנדע נייעס אז צום ערשטן מאל וועט כ"ק אדמו"ר מטאהש שליט"א פראווענען א געהויבענע שבת געאייגענט פאר נגידים ותומכים, און וועט זיין געווידמעט פאר די חסידים וואס שליסן זיך אן מיט גרויסע סכומים למען החזקת המוסדות דחסידי טאהש אין ניו יארק.
דאס קומט נאכדעם וואס אין די לעצטע דריי יאר איז די גבולי הקדושה שטארק פארברייטערט געווארן, ווען בנשיאותו פון כ"ק אדמו"ר מטאהש שליט"א איז געעפנט געווארן עטליכע מוסדות פאר חסידי טאהש אין ניו יארק, א תלמוד תורה אין מאנסי, א תלמוד תורה אין בארא פארק, א מיידל שולע אין וויליאמסבורג, און איבער אלעם די העכסט מוצלח'דיגע ישיבה קטנה תפארת משולם פייש ד'טאהש וואס איז סטאנציאנירט אין טשעסטער בגלילות קרית יואל, און די נייע ישיבה גדולה וואס ווערט געעפנט בעז"ה צום קומענדיגן שנת הלימודים אין א מזל'דיגע שעה.
אוועקצושטעלן א יסוד איתן פאר די פריש בליענדע מוסדות הקדושים אין ניו יארק, ווערט אצינד אהערגעשטעלט דעם ערשטמאליגן שבת מיטן נאמען "שבת המייסדים", אין וואס עס וועלן אנטייל נעמען די נגידים ותומכים מיט שיינע סכומים, און מיטהאלטן דעם שבת בצל הקודש מיטן רבי'ן אינאיינעם כשהמלך בשדה.
די שבת איז באשטימט אויף קומענדיגן שבת פרשת בהר בחוקותי, שבת מברכים חודש סיון, און וועט אהערגעשטעלט ווערן דורך די ברייט בארימטע YF פראדאקשען פירמע, אין שפיץ פון העסקן המפורסם ר' יוחי פליישמאן הי"ו און זיינע געטרייע מיטהעלפער. און וועט פארקומען אין א פראכטפולע לאקאל אין אלבאני ניו יארק, וואס געפונט זיך אויפן מאפע צווישן די היימישע געגנטער אין ניו יארק, און די הייליג שטעטל קרית טאהש קאנאדע פון וואו דער רבי קומט צו פארן אינאיינעם מיט די ארטיגע תומכים.
