חסידי ומעריצי בית וויזניץ אין שטאט בראזיל, אינעם ווייטן סאוט אמעריקע, גרייטן זיך אין די טעג צו אנטפאנגען אויף א ערשטמאליגע באזוך דער חשובער גאסט, כ"ק אדמו"ר מוויזניץ שליט"א פון בית שמש, וועלכער נעמט אונטער דעם לאנגן רייזע קיין בראזיל אויפצוטרייבן פינאנאציעלע שטיצע לטובת מוסדותיו הקדושים וואס בליען און וואקסן אין שטאט בית שמש.
א וויזניצער רבי אין בראזיל איז שוין היינט א זעלטנהייט, אבער מיט יארן צוריק פלעגט זיין פאטער כ"ק אדמו"ר הרה"ק בעל תורת מרדכי מוויזניץ זי"ע פארן כסדר קיין בראזיל אויפצוטרייבן געלט שטיצע פאר די מוסדות, דער וויזניצער רבי זצ"ל האט עטליכע מאל געפראוועט א שבת אין בראזיל, און געווארן ווארעם אויפגענומען דורך חסידי ומעריצי בית וויזניץ וואס וואוינען דארט.
אצינד נאך א צייט אפשניט פון ארום דרייסיג יאר, וועט בנו הצעיר כ"ק אדמו"ר מוויזניץ שליט"א פון בית שמש מופיע זיין בשערי העיר, און פראווענען א גייסטרייכע וויזניצע שבת אין די סאו פאולא געגנט וואו עס וואוינען חשובע ידידים ומעריצים און וואוילטעטיגע פילאנטראפן. דער רבי שליט"א וועט האבן די אכסניא אין שטוב פון הרב יצחק בערקאוויטש שליט"א, און פראווענען דעם שבת איינגעטיילט צווישן די בתי מדרשים "בית יצחק" און "מאור התורה".
די שבת איז באשטימט אויף קומענדיגע וואך פרשת אחרי קדושים, און לויטן פלאן וועט דער רבי וויילן אין שטאט פון מיטוואך אחרי קדושים, ביז דינסטאג פרשת אמור ט"ו אייר.
