קאמפיין וועט בעז"ה פינאנצירן דאס ברענגען דעם ריזיגן ביהמ"ד לידי גמר, אז מען זאל שוין קענען דערין אפרעכטן דעם ירח האיתנים הבעל"ט
דעם קומענדיגן זונטאג און מאנטאג פרשת אמור, י"ג און י"ד אייר, איז דורך ק"ק באבוב – 45 באשטימט געווארן דער קאמפיין אויפצוטרייבן פאנטאסטישע נדבות צו קענען פארענדיגן דעם גיגאנטישן בנין הביהמ"ד וואס ווערט געבויעט אין צענטער פון בארא פארק אויף די 49'סטע גאס און 14'טע עוועניו.
דער איצטיגער קאמפיין קומט נאכדעם וואס אין די לעצטע חדשים האט זיך די ארבייט גאר שנעל פאראויסגערוקט. דער גאנצער דרויסענדיגער סטרוקטור שטייט שוין אויף א הייעך פון 60 פיס העכער דער ערד, און נאך 40 פיס אונטער דער ערד.
אינעווייניג אינעם בנין זענען שוין פארענדיגט געווארן אויף אלע זיבן שטאקן פון די געביידע, די עלקטעריק, פלאמבינג, עירקאנדישאן און הייצונג סיסטעמען, לאו וואלטעזש, פרעימינג און אלעס וואס עס פעלט זיך אויס צו לויפן אינעווייניג אין די ווענט, אין די יעצטיגע טעג ווערן די ווענט צוגעמאכט און פארענדיגט אויף אלע שטאקן פונעם בנין.
52 מיליאן דאללער שוין געשאפן
דערווייל, זינט דאס אויפקויפן פון די שטחים, ביז צום יעצטיגן שטאפל אין די בוי ארבייט, האט שוין דער פראיעקט אפגעקאסט די פאנטאסטישע סומען פון איבער 52 מיליאן דאללער, וואס דאס אלעס איז געשאפן געווארן דורך די הנהלת קרן הבנין, סיי פון די נגידים ושועים פון די קהילה און סיי פונעם אלגעמיינעם ציבור בני הקהילה.
צווישן די גרעסערע נדבות וואס זענען אריינגעקומען ציילן זיך: הרה"צ רבי יחזקאל שלאף שליט"א אב"ד ביאלאווא וועלכע האט מנדב געווען זכות ביהמ"ד הגדול 'אהל נחום' ע"ש אביו הרה"צ רבי נחום שלאף זצ"ל. דער גאנצער מבצר האדיר וועט גערופן ווערן 'בנין דונער' און איז נתנדב געווארן דורך הנגיד הטפסר ר' בן ציון דונער ע"ה, און לאחר פטירתו דורך בניו החשובים שיחי' לשמו ולזכרו. דער היכל התורה טראגט דעם נאמען 'עץ חיים' ע"ש הרה"ח ר' חיים וואלקאן ז"ל מתלמידי בעל הקדוש"צ זי"ע נדבת נכדו הנגיד החסיד ר' שלמה גאלדשטיין הי"ו. האחים הנגידים לבית פרישוואסער שליט"א נכדי מרן הרה"ק בעל הקדושת ציון מבאבוב הי"ד וועלכע האבן מנדב געווען דעם מקוה טהרה מעייני הישועה, ע"ש אביהם הנגיד החסיד ר' יהושע מאיר פרישוואסער ז"ל. דער פראכטפולער ארון הקודש איז נתנדב געווארן פאר א סכום אדיר דורך הנגיד הנכבד הרב שמואל זיינוויל שארף שליט"א לז"נ אביו הרבני הנגיד ר' לייבוש שארף ז"ל.
א חלק הארי פון די נדבות איז אריינגעקומען דורך די בעה"ב ואברכי הקהילה וועלכע האבן זיך אלע אונטערגעגארטלט מיט מסירת נפש און גענומען אויף זיך מנדב צו זיין 18 טויזענט דאללער עפ"י די פערזענליכע בקשה פונעם רבי'ן שליט"א תיכף ביים אנהייב פונעם פראיעקט מיט עטליכע יאר צוריק, און כהיום האט שוין רוב רובו פונעם ציבור אויסגעצאלט דעם גרויסן התחייבות.
אסיפה רבתי
אצינד ווען דער בנין איז שוין אט גרייט, און שטייט אין די לעצטע שטאפלן איידער מען זיך בעז"ה אריינציען, פעלט זיך נאך אויס אויפצוטרייבן א באדייטענדע סומע געלט צו ברענגען דעם מאסיוון פריאעקט לידי גמר. דעריבער האט די הנהלת קרן הבנין בברכת קדשו פונעם רבי'ן שליט"א געלאזט אין גאנג דעם מגבית 'פתיחת שערים', וואס כשמו הוא כן הוא, א קאמפיין פאקטיש צו עפענען דעם שערי הבנין הגדול והמפואר דעם קומעדיגן ראש השנה שנת תשפ"ו.
דעם פארלאפענעם זונטאג פ' אחרי – קדושים האבן זיך די טויזענטער חסידים צונויפגעזאמעלט צו אן אסיפה רבתי אין בעפארברייטונג צום מגבית. דער אסיפה איז פארגעקומען בתוככי הבנין החדש אויפן אונטערשטן שטאק, וואס וועט דינען אלס היכל התורה - עץ חיים.
איידער די אסיפה האט דער ציבור געהאט די געלעגנהייט ארומצושפאצירן אינעם געביידע און מיטהאלטן פון דער נאנט די העפטיגע פארשריט וואס איז געמאכט געווארן אין די לעצטע תקופה, ווען ארום 80 פראצענט פון די ארבייט איז שוין בס"ד אינגאנצן פארענדיגט.
והיה המשכן אחד
ביים אסיפה האט מען געהערט א באריכט פונעם מייסטער ארכיטעקט פונעם געביידע הר"ר אהרן עסטרייכער הי"ו פון ארה"ק, וועלכע האט איבערגעגעבן די דעטאלירטע פלענער וואס מען פלאנט צו טון מיטן עקזעטירענדן געביידע וואס דינט אצינד אלס ביהמ"ד לימות החול פון די קהילה און אלס היכל הכולל פון די אברכים, באקאנט אלס די 'באלקעני' געביידע. וואס א גרויס טייל פונעם יעצטיגן קאמפיין איז געווידמעט צו פינאנצירן דעם טייל פונעם פראיעקט.
לויט די פלענער וואס זענען פארגעשטעלט געווארן פארן ציבור, וועט דער גאנצער באלקעני געביידע ווערן א טייל פונעם בנין הביהמ"ד, און דער בנין וועט בלייבן שטיין כמו שהוא, און וועט נישט אראפגעווארפן ווערן. נאר עס וועט אדורכגיין א דורכדרינגליכטן איבערבוי, ווען אלעס וואס געפונט זיך אצינד אינעם בנין וועט גרונטליך איבערגעבויט ווערן פונדוסניי. די דעזיינס און אויסלייג פונעם רענאווירטן באלקעני געביידע וועט זיין אייניג מיטן רעשט פונעם גאנצן בנין, און עס וועט זיך נישט דערקענען אז דאס איז בכלל א צוזאמגעשטעלטער געביידע.
אויפן ערשטן שטאק וועלן אויפגעבויעט ווערן עטליכע שטובער אלס חדרי התפילה, און וועט ווערן באהאפטן צו די רעשט חדרי התפילה אויפן ערשטן שטאק, וואס דאס וועט ברענגען דעם צאל חדרי התפילה צו 8. און אויפן צווייטן שטאק וועט זיך דער געביידע באהעפן צום היכל ביהמ"ד הגדול, און צוגעבן נאך גאנצע ריזן שטח צום ביהמ"ד הגדול, צוגעבענדיג נאך הונדערטער זיץ פלעצער לרווחת הציבור הגדול המסתופפים בצל הקודש.
אזוי אויך צוליב דעם וואס אויפן דריטן שטאק פונעם באלקעני בנין וועט אויפגעבויעט ווערן דער גרויסער סוכה פון 7,000 סקוויר פיס גרויס און 40 פיס הויעך, וועלן דעריבער אויף די ערשטע צוויי שטאקן צוגעלייגט ווערן שווערע זוילן צו קענען האלטן די אויבערשטע שטאקן מיט א פעסטקייט.
לויט די פלענער וואס ר' אהרן עסטרייכער האט איבערגעגעבן וועלן די צוויי געביידעס שוין באהאפטן ווערן און אריינגיין אין באנוץ שוין דעם קומענדיגן ראש השנה הבעל"ט.
אזוי אויך איז ביים אסיפה רבתי געמאלדן געווארן די פלענער פארן צווייטן פאזע פונעם ביהמ"ד הגדול, ווען בקרוב וועלן די תלמידי המתיבתא פארלאזן דעם עקזעסטירנדן בנין המתיבתא אויף די 52'סטע גאס. דארט וועט בעז"ה אויפגעבויעט ווערן א בנין רחבת ידיים פאר די Y געביידע, וועלכע וועלן דערפאר איבערגעבן פאר קהילת באבוב – 45 זייער יעצטיגע געביידע און דערויף וועט אי"ה אין צוקונפט אויפגעבויעט ווערן דער צווייטער פאזע פונעם ביהמ"ד הגדול. (באזונדער ווערט דורך די הנהלת המתיבתא אויפגעבויעט אין די יעצטיגע טעג א בנין גדול ומפואר רחבת ידיים אויף די 38'סטע גאס אין בארא פארק).
עס זענען געהערט געווארן קורצע דרשות פון העסקן החשוב הרב בן ציון יוסף ריינהאלד הי"ו יו"ר הפאנדרעיזינג אפיס, וועלכע האט איבערגעגעבן א קורצן באריכט פון די געוואלדיגע פעולות וואס עס זענען שוין געטון געווארן דורכן פאנדרעזינג אפיס צו שאפן די נויטיגע פאנדן און מיט א קלארקייט ערקלערט פארן ציבור פארוואס עס איז אזוי וויכטיג זיך צו ווענדן צו אחינו בני ישראל צו העלפן די קהילה קדושה פארענדיגן דעם בנין. אזוי אויך האט מען געהערט וויכטיגע אנווייזונגען פון הר"ר שלמה זלמן שפיטצער הי"ו, וועלכע איז בארימט אין די וועלט פון פאנדרעיזינג און קאמפיינען, וועלכע האט איבערגעגעבן טעכנישע אנווייזונגען און עצות טובות וויאזוי צו קענען שאפן די סכומים וואס דער ציבור נעמט זיך אונטער.
דברות קודש
מיט א יראת הכבוד האט דער ציבור האלפים זיך איינגעהערט צו די דברות קודש פון כ"ק מרן אדמו"ר מבאבוב – 45 שליט"א. וועלכע האט אנגעהויבן מיט א שבח והודיה צום אויבערשטן אז בזכותם פון אבותיו ורבותיו הק' איז מען זוכה אז מ'האלט שוין דא, אז מען שטייט שוין אינעווייניג אינעם בנין הגדול והקדוש, וואס דא וועלן מיר בעז"ה דינען אויבערשטן מיט אן הרחבת הדעת ביז משיח'ס טאג.
א לענגערע צייט האט דער רבי מאריך געווען בשבחו פון די הייליגע קהילה וועלכע האבן זיך כולם כאחד אריינגעווארפן מיט א מסירת נפש צו קענען ברענגען דעם בנין צום ווייטגרייכנדן שטאפל ווי עס געפונט זיך שוין אצינד בס"ד. דער רבי האט אריינגעטייטשט די בחינות פון די מסירת נפש פונעם ציבור אין די מידות פון די פארלאפענע ימי הספירה חסד, גבורה און תפארת. נאכזאגענדיג מפי ספרים וסופרים מדברות קדשו פון אדמור"י באבוב זי"ע ולמעלה בקודש און פאסיג אריינגעטייטשט צום יעצטיגן מאורע.
דער רבי האט אויך אויסגענוצט די געלעגנהייט ספעציעל צו באדאנקן די חשוב'ע עסקנים וואס האבן משים געווען ימים כלילות כדי צושטאנד צו ברענגען דעם מאסיוון פראיעקט, און האבן זיך אצינד פון פריש אנגעגארטעלט מיט פרישע כוחות צו שאפן דאס פארבליבענע וואס מען דארף כדי צו ברענגען דעם בנין לידי גמר און זיך קענען אריינציען דערין בעז"ה קומענדיגן ראש השנה תשפ"ו.
דאן האט דער רבי זיך געוואנדן צום גאנצן ציבור און געבטן פון יעדן איינעם באזונדער אז מ'זאל זיך אונטערנעמען פון פריש סכומים עצומים, און לכה"פ דעם סכום פון 5,400 דאללער, ביים קאמפיין וואס וועט פארקומען קומענדיגן זונטאג און מאנטאג פ' אמור. דער רבי שליט"א האט מדגיש געווען אז דער קאמפיין וועט זיין אויפן מערסט אויסגעהאלטענעם אופן, לויט די כללים וואס זענען באשטימט געווארן דורך די הנהלת חומת הדת פון די קהילה לענייני טעכנעלאגיע.
נעשה ונשמע
די דברות קודש פון רבי'ן האט אריינגעברענגט א גייסט פון התלהבות דקדושה ביים גאנצן ציבור, און מן המחשבה אל המעשה איז באלד אויסגעטיילט געווארן א ספעציעלער צעטיל ווי דער ציבור האט געקענט אריינשרייבן וויפיל געלט זיי נעמען זיך אונטער צו שאפן, און נאכן אריינפילן איז דער ציבור אריבער כבני מרון פארן רבי'ן שליט"א איבערגעבענדיג דעם שטר קבלה און ערהאלטן ברכת קדשו.
אן עקסטערע קורת רוח האט זיך אנגעזען אויפן רבי'ן שליט"א, ווען א טייל פונעם ציבור האט זיך אונטערגענומען גרעסערע סכומים ווי מען האט געבעטן, א שיינער ציבור האט גענומען אויף זיך דעם סכום פון 18 אלפים, און עטליכע האבן גענומען אזויפיל ווי 100 אלפים. דער רבי איז געזיצן נאכן מעמד און אפגענומען די שטרי קבלה פון די חסידים במשך עטליכע שעה נאכאנאנד, נאכגעפאלגט מיט נאך עטליכע שעה במשך דעם פאלגענדן טאג מאנטאג.
באזונדער איז דעם פארלאפענעם מאנטאג פארופן געווארן א מסיבה דורכן רבי'נס זון הרה"צ רבי יחזקאל אונגער שליט"א - וועלכע איז פון די בריחי התיכון פון דעם פארצווייגטן פראיעקט – וועלכע איז געווען געווידמעט פאר נגידים און עסקנים וועלכע האבן די מעגליכקייטן אויפצוטרייבן גרעסערע סכומים. ביים מסיבה האט מען געהערט דברות קודש פון רבי'ן שליט"א, און די נדיבים זענען אריבער דעם רבי'ן שליט"א איינציגווייז איבערגעבן דעם סכום וואס זיי נעמען זיך אונטער צו שאפן.
אצינד זענען די עיניים צופיות פון די באבוב-45 חסידים געוואנדן צו אונזערע ברודער אחינו בני ישראל בכל מקומות מושבותיהם. אנקעגן צו קומען מיט סיוע שיש בו ממש און ארויסהעלפן די קהילה נאה וחסידה וועלכע שטייען שוין ענדליך ביים שוועל פון אנקומען אל המנוחה ואל הנחלה, נאך אזויפיל יארן נישט האבענדיג אייגענע ד' אמות וואו צו קענען דינען השי"ת מיט הרחבת הדעת.
עס איז ערווארטעט אז כלל ישראל וועט ארויסווייזן שטיצע און העלפן די חברי הקהילה אנקומען צו זייערע צילן, און דערמיט ברענגען לידי דעם בנין האדיר 'מרכז העולמי דחסידי באבוב – 45', לתפארת הקהילה הק' ולתפארת רבותיהם הק' זי"ע.
פאקטן און ציפערן ארום דעם אויפבוי פונעם מרכז העולמי דחסידי באבוב – 45
18 מיליאן דאללער איז געשאפן געווארן אין איין נאכט ביים אסיפת היסוד דער ערשטער מגבית לטובת דעם בנין הביהמ"ד.
8 חדשים האט געדויערט בלויז דאס אויפגראבן דעם שטח אויף וואס דער בנין שטייט אצינד.
42 טיף אין דער ערד איז אראפגעגראבן געווארן צו מאכן פלאץ פארן היכל התורה, שטאק פון די מקוה, און שטאק פון די חדרי התפילה.
1,484 טראקס מיט זאמד זענען אוועקגעפירט געווארן פונעם שטח הבניה.
6 מיליאן דאללער האט געקאסט דאס פאבריצירן און אינסטאלירן די שטאלענע זוילן וואס האלטן דעם גאנצן בנין.
8 מיליאן דאללער האט געקאסט די יסודות און דאס גיסן די קאנקריט אויף אלע 7 שטאקן פון די געביידע
1.4 מיליאן דאללער האבן געקאסט די פענסטער'ס אינעם געביידע, וועלכע זענען פאברצירט געווארן אין פארטוגאל.
18,000 סקוויר פיס איז דער שטח פונעם גאנצן בנין הביהמ"ד אינעם ערשטן פאזע, איינמאל דער רענאווירטער באלקעני בנין וועט זיין באהאפטן צום נייעם בנין הביהמ"ד. (אינעם צווייטן פאזע וועט דער ביהמ"ד פילפאכיג פארגרעסערט ווערן צו א שטח עצום פון 30,000 סקוויר פיס).
7 שטאק פארמאגט דער בנין. ערשטער שטאק איז דער היכל התורה, צווייטער שטאק איז די מקוה, דריטער שטאק זענען די חדרי התפילה, פערטער שטאק איז דער היכל הביהמ"ד הגדול, פינעפטער, זעקסטער און זיבעטער שטאק זענען די גאלעריען פאר די עזרת נשים.
380 לומדים וועלן קענען עוסק זיין בתורה אויף איינמאל, אינעם גרויסן היכל התורה עץ חיים, וועלכע וועט אגב זיין דער גרעסטער היכל התורה אין בארא פארק.
300 אידן אומגעפער וועלן זיך אי"ה קענען באנוצן מיט די רחבות'דיגע מקוה אויף איינמאל.
700 פריוואטע לאקער'ס וועלן שטיין צום באנוץ פונעם ציבור אויפן שטאק פון די מקוה.
7 חדרי התפילה וועט דער בנין פארמאגן אינעם ערשטן פאזע.
6 מניינים שחרית וועלן פארקומען יעדע שעה אין די וואכנטעג אין די חדרי התפילה.
16,000 סקוויר פיס וועט זיין דער היכל ביהמ"ד הגדול אינעם ערשטן פאזע וועלכע וועט בעז"ה באנייט ווערן קומענדיגן ראש השנה הבעל"ט, וועלכע וועט אינאיינעם מיט די גאלעריען אריינעמען עטליכע טויזנט זיץ פלעצער. (דער היכל הביהמ"ד וועט ביים צווייטן פאזע בעז"ה געדאפעלט ווערן).
50 פיס הויעך איז דער דאך אינעם היכל הביהמ"ד.
3 רחבות'דיגע גאלעריען פאר די עזרת נשים זענען פארהאן אינעם בנין.
29 פארשידענע מאשינען זענען אינסטאלירט געווארן אויפן דאך פונעם בנין.
100 פיס הויעך איז דער בנין אלע שטאקן אינאיינעם.
52.9 מיליאן דאללער האט דער וועד קרן הבנין שוין איינקאסירט פון גרעסערע און קלענערע תורמים, פרוטה ופרוטה מצטרפת לסכום אדיר. דער ציפער רעכנט נישט אריין די פילצאליגע נדרים והבטחות לטובת הבנין וואס זענען נאכנישט באצאלט געווארן.
16 מיליאן דאללער מוז נאך געשאפן ווערן אין פרישע פאקטישע נתינות ביז ראש השנה הבעל"ט, כדי צו קענען גענצליך פארענדיגן דעם נייעם בנין און רענאווירן דעם באלקעני געביידע, כדי אז מ'זאל זיך קענען אהין אריינציען ר"ה תשפ"ו.
