דעם קומענדיגן שבת קודש פרשת אחרי קדושים, וועט געפראוועט ווערן א געהויבענע שבת אינעם ווייטן לאס אנדזשעלעס, בצל הקודש פונעם חשובן גאסט פון ניו יארק, כ"ק אדמו"ר מקאשוי שליט"א, וועלכער קומט צו פארן קיין לאס אנדזשעלעס לטובת מוסדותיו הקדושים, און צו משפיע זיין פאר די לאקאלע אידנטום מבאר תורתו.
דער רבי שליט"א איז ממשיך מסורת אביו הגה"ק מקאשוי זי"ע בעל ברכת שמים, וועלכער פלעגט כסדר פארן קיין לאס אנדזשעלעס צו משפיע זיין אויף די תושבי העיר. דער רבי שליט"א פארט אהין כסדר יעדע שטיק צייט, און גרייט זיך אצינד אויפן היי יעריגן נסיעה וואס קומט פאר די וואך פרשת אחרי קדושים.
די אכסניא פון רבי'ן וועט זיין אין שטוב פון הרבני הנגיד ר' אפרים שמואל דויטש הי"ו, דאנערשטאג נאכט וועט פארקומען א מעמד קבלת פנים אין שטוב פון הרבני הנגיד ר' רפאל משה יוסף דויטש הי"ו, און שבת קודש וועט דער רבי פראווענען די תפילות אין די חסידישע כולל יחיאל יהודה, וואו דער רבי וועט אויך אויפטרעטן מיט א שיעור פרקי אבות כנהוג שבת נאכמיטאג.
מאנטאג פרשת אמור פסח שני, וועט דער רבי שליט"א אפרעכטן דעם טיש לכבוד היום, אין שטוב פון הנגיד החסיד ר' בערל ווייס הי"ו, מיט די באטייליגונג פון א גרויסע ציבור תושבי העיר.
