אלפי חסידי וויזניץ האבן אויפגענומען מיט גרויס פרייד די מודעה מטעם בית כ"ק אדמו"ר מוויזניץ שליט"א, אז אין די קומענדיגע טעג וועט זיך דער רבי שליט"א צוריקקערן אהיים קיין ארץ ישראל מיטן אויבערשטנ'ס הילף, און פראווענען דעם יו"ט ל"ג בעומר אינאיינעם מיט די טויזענטער חסידים בקרית מלך רב, קרית וויזניץ בני ברק.
א צייט אפשניט פון נאנט צו דריי חדשים, אריבער צען לאנגע וואכן איז אריבער זינט דער רבי שליט"א האט פארלאזט ארץ ישראל, זונטאג פרשת תרומה, פארנדיג אויפן וועג קיין לאס אנדזשעלעס וואו דער רבי איז אריבער א קאמפליצירטע אפעראציע, שווערע טעג איז אריבער דורכאויס די תקופה, ווען דער רבי איז געווען שפיטאליזירט עטליכע מאל, און האט זיך בחסדי ה' עטוואס ערהוילט צום טיפן פרייד פון די טויזענטער חסידים אומעטום.
דעם רבינ'ס אהיימקומען איז א אומבאשרייבליכע שמחה ביי יעדן חסיד, מיטן האפענונג אז דער רבי זאל זיך ווייטער ערהוילן און צוריקקומען צו די כוחות בסייעתא דשמיא. דער רבי געפונט זיך אצינד אין דאוואס שווייץ שוין קרוב צו צוויי וואכן, און אין די קומענדיגע טעג וועט דער רבי פארזעצן די רייזע קיין ארץ ישראל און זיך אומקערן למעון קדשו אין קרית וויזניץ בני ברק.
מטעם הקהילה איז געמאלדן געווארן די זמנים אויף ל"ג בעומר הבעל"ט, דאנערשטאג נאכט וועט דער רבי שליט"א מדליק זיין די מדורה ברוב עם הדרת מלך, בהיכל ביהמ"ד הגדול אין קרית וויזניץ בני ברק, דער רבי וועט אריינקומען צו תפילת מעריב און ספירת העומר אכט אזייגער אויפדערנאכט, און תיכף דערנאך וועט פארקומען די מעמד ההדלקה. דערנאך וועט מען זיך ארויסלאזן אין פייערליכע ריקודין ברחובה של עיר צו דאנקן און לויבן דעם אויבערשטן אויף די גרויסע חסדים, אין די צייט וואס דער רבי שליט"א וועט ארויספארן מחוץ לעיר זיך צו ווייטער אפרוען צו שעפן פרישע כוחות מיטן אויבערשטנס הילף, ביז דעם קומענדיגן יום טוב שבועות הבעל"ט.
