אין די יעצטיגע שעה'ן געפונט זיך כ"ק אדמו"ר מוויזניץ שליט"א לרפו"ש אויפן פליגער אהיים קיין ארץ ישראל, נאך לאנגע וואכן וואס דער רבי האט זיך אויפגעהאלטן אינעם ווייטן לאס אנדזשעלעס לצרכי רפואה, וואו דער רבי איז אריבער א קאמפליצירטע אפעראציע מיט הצלחה ב"ה, און די לעצטע צוויי וואכן וואס דער רבי האט געוויילט אין דאוואס שווייץ אויף אפרוה.
היינט פארמיטאג עלף אזייגער אויף די שווייצער זייגער, האט דער רבי פארלאזט די בית האכסניא אין דאוואס שווייץ, און פאר א קבוצה וויזניצע חסידים וואס האבן ארויסבאגלייט דעם רבי'ן האט דער רבי געזאגט אז א מענטש דארף זיך מחזק זיין אין יעדע מצב, און וויסן אז אלעס איז פונעם בורא כל עולמים, און אויך ווען מען זעהט נישט פון פאראויס, קומט צום סוף די ישועה גדולה.
דעם רבינ'ס פליגער איז ערווארטעט צו לאנדן עטליכע מינוט בעפאר זיבן אזייגער פארנאכטס ארץ ישראל'דיגע זייגער, און פון דארט וועט דער רבי אריינפארן צום מושב "אורה" וואס געפונט זיך נישט ווייט פון ירושלים עיה"ק, דארט וועט דער רבי פארוויילן די קומענדיגע וואכן אויף אפרוה, און זיך מיטן אויבערשטנס הילף צוריקקערן לאיתנו הראשון. מארגן אויפדערנאכט ליל ל"ג בעומר וועט דער רבי מופיע זיין פאר עטליכע שעה בשערי קרית וויזניץ בני ברק, און אפרעכטן די גרויסע הדלקה ווי געמאלדן.
