אלפי חסידי סקווירא נעמען אצינד אויף מיט איבערראשונג די פרייליכע מעלדונג מטעם בית כ"ק אדמו"ר מסקווירא שליט"א, אז עס איז באשטימט געווארן די דאטום פארן שבת חנוכת הקריה פון די נייע שטעטל "קרית סקווירא" אויף קומענדיגן שבת פרשת ראה שבת מברכים חודש אלול, ווען כ"ק אדמו"ר מסקווירא שליט"א וועט צום ערשטן מאל פראווענען א געהויבענע שבת בתוככי קרית מלך רב און אוועקשטעלן דעם עתיד פאר די נייע שטעטל.
ווי באקאנט ווערט געבויעט א שפאגל נייע ישוב פאר חסידי סקווירא מיטן נאמען "קרית סקווירא", אין שטאט בעטהעל אין ניו יארק אין די הויכע קאנטרי בערג, ווייטער ארויף פון מאנטיסעלא, טראץ וואס מען האלט עטוואס מער ווי א יאר זינט די מעמד הנחת אבן הפינה אין שפיץ פונעם רבי'ן שליט"א און די נדיבי לב, גרייט מען זיך שוין אין די קומענדיגע וואכן צו ארייננעמען די ערשטע איינוואוינער אינעם נייעם שטעטל אין א מזל'דיגע שעה.
אצינד איז באשטעטיגט געווארן אז כ"ק אדמו"ר מסקווירא שליט"א וועט פראווענען א געהויבענע שבת חנוכת הבית אין די נייע שטעטל, דעם ענדע זוממער שבת מברכים חודש אלול, ווען די נייע איינוואוינער אין "קרית סקווירא" וועלן האבן די געלעגנהייט מיטצוהאלטן דעם זעלטענעם מאמענט ווען דער רבי טוט באנייען א שפאגל נייע עתיד פאר כלל חסידי סקווירא. די גענויע דעטאלן איבער דעם גרויסן שבת ווערט אצינד אויסגעארבעט דורך די טעטיגע עסקנים, און וועט בעז"ה ווייטער פאראויסגיין אין די קומענדיגע חדשים ביז דעם גרויסן שבת הבעל"ט.
