בחצר הקודש וויזניץ אין בארא פארק איז אין די יעצטיגע טעג באשטעטיגט געווארן די פלענער אויף א גרויסע מסע הקודש קיין אייראפע, וואס וועט פארקומען אין עטליכע חדשים ארום סוף זוממער, אין די וואך פון פרשת ראה בעפאר חודש אלול, ווען כ"ק אדמו"ר מוויזניץ שליט"א פון בארא פארק וועט אפרייזן צו די מקומות הקדושים אין אייראפע אינאיינעם מיט פילע תלמידים וחסידים.
דער רבי שליט"א נעמט אונטער די נסיעה לקראת די שמחת החתונה פון בנו החתן, וואס קומט פאר קומענדיגע יאר ראש חודש אדר אינעם עיר ואם בישראל בארא פארק, מיט די כלה א אייניקל ביים רבינ'ס פעטער כ"ק אדמו"ר מוויזניץ שליט"א פון ירושלים. די נסיעה וועט זיין א ספעציעלע געלעגנהייט וואס פילע חסידים וועלן מיטהאלטן, און אזוי אויך די בחורי הישיבות הקדושות וואס וועלן האבן די זכיה צו אנטייל נעמען.
א ספעציעלע פראגראם איז געלאזט געווארן אין גאנג אין די יעצטיגע טעג בין כותלי הישיבה גדולה תפארת מרדכי וויזניץ אין סטעטן איילענד, וואו די בחורים זיצן און הארעווען הונדערטער שעות רצופות צו קענען מיטפארן אויף די געהויבענע נסיעה.
זונטאג פרשת ראה וועט מען זיך ארויסלאזן אויפן וועג פון ניו יארק, צוערשט וועט מען אנקומען קיין אוקראינע און פוקד זיין די קברי אבות, און דעם ציון הק' פונעם הייליגן בעל שם טוב זי"ע אין שטאט מעזיבוזש. דערנאך וועט מען פארזעצן די רייזע קיין ליזענסק און פוקד זיין פילע קברי צדיקים דורכאויס די וואך.
דאנערשטאג ערב ראש חודש אלול מוקדם וועט מען פוקד זיין דעם ציון הק' פונעם הייליגן רבי'ן ר' אלימלך זי"ע אין ליזענסק, און דארט אויסזאגן גאנץ ספר תהלים כנהוג אין וויזניץ אין דעם גרויסן טאג. עס וועט נאכפאלגן מיט א זעלטן געהויבענע שבת אין שטאט דינוב אין פוילין, סמוך ונראה צום ציון הק' פונעם הייליגן בני יששכר זי"ע.
אויף די מעמד התפילה אין ליזענסק, און אויף דעם גרויסן שבת אין דינוב, וועלן קומען צו פארן נאך פילע חסידים און בעלי בתים, וואס וועלן זיך מיטכאפן אויף די לעצטע טייל פון די נסיעה בצל הקודש, און זונטאג פרשת שופטים וועט מען זיך אומקערן צוריק אהיים קיין ניו יארק מלא וגדוש מיט השפעות טובות.
