חסידי צאנז אין אמעריקע גרייטן זיך מיט גרויס התרגשות צו מיטהאלטן היסטארישע טעג, ווען כ"ק אדמו"ר מצאנז שליט"א וועט אנקומען צוגאסט קיין ניו יארק קומענדיגן חודש סיון, צו זיין א טייל פון די היסטארישע מסע הגדולים לטובת "קרן עולם התורה", מיטן ציהל אויפצוטרייבן אריבער הונדערט מיליאן דאללער לטובת די ישיבות און כוללים בארץ הקודש.
פארלאפענע וואך ווען דער צאנזער רבי שליט"א איז געווען אויף אן אסיפה אין שטוב פון מרן ראש הישיבה הגאון הגדול רבי דוב לאנדא שליט"א, האט דער ראש ישיבה פארבעטן דעם רבי'ן זיך אנצושליסן אין די נסיעה וואס וועט זיכער אסאך צוהעלפן אויפצוטרייבן גרעסערע געלטער. דער רבי האט דאן אויסגעדרוקט זיין שטארקע חשק מיטצופארן, אבער פון די אנדערע זייט אויסגעדרוקט זארג אז צוליב זיין מצב הבריאות איז עס נישט קיין פשוטע פראגע.
נאכן אנפרעגן דעם דאקטער וועלכער האט געגעבן ערלויבעניש, איז באשטעטיגט געווארן אז דער רבי שליט"א וועט מיטפארן אויף די געהויבענע נסיעה, און וועט זיין צוגאסט אין ניו יארק אין די וואך פון פרשת שלח, באשיינען די מעמדים מיט די אנדערע גדולי ישראל, און דערביי אויסנוצן די געלעגנהייט מחזק צו זיין קהל חסידי צאנז איבער גרעיטער ניו יארק און ניו דזשערזי.
נאך וואס אויף שבת פרשת שלח איז געווען געפלאנט פארצוקומען א גרויסע שבת מיטן נאמען "עתיקא קדישא", וואס דער רבי האט געזאלט פראווענען ביים כותל המערבי אינאיינעם מיט די נגידי ותומכי המוסדות, זענען די פלענער געווארן אפגעשטופט צוליב די יעצטיגע נסיעה, און די שבת וועט פארקומען אין איינער פון די ווינטער שבתים הבעל"ט.
אצינד ווערן געמאכט העפטיגע פלענער פאר א גרויסע שבת התאחדות קומענדיגן פרשת שלח, וואס וועט צונויפברענגען די הונדערטער תלמידי וחסידי צאנז פון איבער גרעיטער ניו יארק און ניו דזשערזי, די עסקנים זענען פארנומען אין די טעג צו טרעפן א פאסיגע לאקאל וואו צו אפרעכטן דעם גרויסן שבת בצל הקודש פון כ"ק אדמו"ר מצאנז שליט"א, וועלכער האט שוין פינף יאר נישט געפראוועט א שבת בקרב חסידיו אין אמעריקע.
