מטעם קהל יטב לב ד'סאטמאר איז געמאלדן געווארן אז צוליב די ריזן ערווארטעטע ציבור וואס קומט צו פארן אויף יום טוב שבועות בצל הקודש פון כ"ק אדמו"ר מסאטמאר שליט"א, וועט היי יאר צום ערשטן מאל ווערן אויפגעשטעלט א גיגאנטישע שאטער פארנט פון תלמוד תורה ויואל משה אויף בעדפארד עוועניו, וואו דער רבי שליט"א וועט אפרעכטן די געהויבענע טישן דורכאויס יום טוב.
אין די לעצטע פאר יאר איז די נעילת החג טיש מוצאי יום טוב פארגעקומען אינעם גרויסן עטרת אברהם זאל בבנין התלמוד תורה עטרת יואל, אבער נאך וואס די בנין גייט אצינד אריבער רענאוואציע ארבעט, און די פאקט אז די היכל בית המדרש איז נישט מעגליך צו ווערן צוגערישט אריינצונעמען אזא ריזן ציבור וואס קומט מיטהאלטן דעם יו"ט בצל הקודש, זענען די עסקנים פון "בצל תומר" וואס גיבן זיך אפ צוצושטעלן אלע באדערפענישן פאר די חסידים המסתופפים בצל הקודש, אריינגעשפרינגען אין דעם פראיעקט אויפצובויען א גיגאנטישע שאטער נעבן די בנין התלמוד תורה אויף בעדפארד.
ווי עס הייסט וועלן אלע טישן דורכאויס יום טוב פארקומען אינעם ריזן שאטער, די טיש ליל יו"ט, די טיש די ערשטע טאג יו"ט ווען דער רבי ליינט די תנאים כנהוג, און די גרויסארטיגע נעילת החג טיש במוצאי יום גילה ווען דער רבי ליינט די כתובה כנהוג.
