מטעם חצר הקודש בעלזא ווערט היינט געמאלדן אז אין ליכט פון די שווערע מלחמה צושטאנד וואס הערשט אין ארץ ישראל, ווען עס הערשט גרויס זארג איבער פליענדע ראקעטן פון איראן, און האט שוין ליידער געקאסט עטליכע קרבנות, וועט די גרויסע שמחת החתונה בחצר הקודש בעלזא וואס קומט פאר די וואך פארקומען אויף א קלענערע פארמאט, כדי צו היטן אויף די אנווייזונגען און נישט פראווענען גרויסע פארזאמלונגען ברוב עם.
די רעדע איז פון די גרויסע חתונה בחצר הקודש בעלזא, די כלה איז די דריטע און יונגסטע טאכטער פון הגה"צ ר' אהרן מרדכי רוקח שליט"א בנו יחידו פון כ"ק אדמו"ר מבעלזא שליט"א, מיט די חתן א זון פון הרה"ג ר' אהרן פענסטער שליט"א. די חתונה קומט פאר דעם מיטוואך, און איז געווען אין פלאן פארצוקומען אין די גרויסע ארענא סטעדיום אין ירושלים.
צוליב די אנגעצויגענע מלחמה צושטאנד ווען מען קען נישט פראווענען די חתונה אויף א גרויסע פארנעם, וועט די שמחת החתונה פארקומען בתוככי קרית מלך רב קרית בעלזא ירושלים, און בהוראת הקודש פון כ"ק אדמו"ר מבעלזא שליט"א וועלן אלע חסידים פארבלייבן אין די שטעט לענגאויס ארץ ישראל און נישט קומען מיטהאלטן פערזענליך אין ירושלים עיה"ק.
אין אלע בעלזא שטיבלעך לענגאויס ארץ ישראל וועט ווערן צוגעשטעלט סעודות מצוה לכבוד די שמחה, און מען וועט מיטהאלטן לעבעדיג דורך מראות הקודש, די מעמד החופה וועט פארקומען אויף א קליינע פארנעם מיט די באטייליגונג פון בלויז די בני המשפחה, אין איינקלאנג מיט די אנווייזונגען פון די באאמטע כדי נישט אריינצוגיין ח"ו אין א מצב סכנה.
