שטייענדיג גאנצע צוויי וואכן נאך וואס כ"ק אדמו"ר מגור שליט"א איז אנגעקומען צוגאסט קיין ניו יארק אויפצוטרייבן גרויסע סכומים לטובת די ישיבות און כוללים דחסידי גור אין ארץ ישראל, אין ראם פון קרן הצלת עולם התורה גור, ווערט געמאלדן אז דער רבי שליט"א גרייט זיך שוין אהיימצופארן צוריק קיין ארץ ישראל באלד נאך שבת.
די ארגינעלע פלאן איז געווען אז דער רבי וועט וויילן אין אמעריקע בלויז עטליכע טעג, און דערנאך איז די נסיעה פארצויגן געווארן ביז איבער שבת. אבער צוליב די מלחמה צושטאנד אין ארץ ישראל איז דער רבי געבליבן געשטראנדעט אין אמעריקע אן קיין געהעריגע וועג אהיים.
אצינד איז באשטעטיגט געווארן אז דער רבי שליט"א וועט זיך ארויסלאזן נאך שבת מיט א פריוואטע פליגער קיין קפריסין, און פון דארט וועט דער רבי אפרייזן קיין ארץ ישראל מיט די ספעציעלע פליגערס וואס ווערט צוגעשטעלט אהיימצוברענגען געשטראנדעטע אידן וואס וואוינען אין ארץ ישראל.
די וואך שבת וועט דער רבי פראווענען אויף א פארמאכטע פארנעם, בבית האכסניא אין שטוב פון הנגיד החסיד ר' מאיר פריי הי"ו אין די פאמאנע געגנט אין מאנסי.
