אין די צייט וואס עס קומט פאר העפטיגע בוי ארבעט ביים גרויסן ביהמ"ד דחסידי טשערנאביל אין בני ברק, בית מדרשו פון כ"ק אדמו"ר מטשערנאביל שליט"א, גרייט מען זיך אויף א געהויבענע מסע הקודש צו די מקומות הקדושים אין אייראפע, ווען דער רבי שליט"א וועט ארויספארן אינאיינעם מיט א געקליבענע צאל נגידים ותומכים וואס שליסן זיך אן מיט גרויסע סכומים לטובת דעם קרן הבנין, פון צוויי און פופציג טויזענט שקל און העכער.
ווי באקאנט האט די הנהלת הביהמ"ד אונטערגענומען דעם בוי פראיעקט באלד נאך יו"ט פסח, מיטן האפענונג אז די צענטראלע היכל בית המדרש הגדול והחדש זאל שוין זיין גרייט אויף די קומענדיגע ימים הנוראים הבעל"ט. ווי מיר האבן באריכטעט דעמאלטס איז די בוי פראיעקט קאנצענטרירט צו פארברייטערן און פארגרעסערן די יעצטיגע בנין הביהמ"ד צו קענען נאכקומען די מאסיווע בליה און וואוקס בליעה"ר.
די מסע הקודש מיטן נאמען "הימלדיגע טעג" איז צוערשט געווען געפלאנט אויף א פריערדיגע דאטום, אבער צוליב די מלחמה אין ארץ ישראל האט מען עס אפגעשטופט, און אצינד גרייט מען זיך דערצו בהכנה דרבה, ארויסצופארן די קומענדיגע וואך פרשת פנחס הבעל"ט, וואו דער רבי וועט צום ערשטן מאל פוקד זיין די מקומות הקדושים אין די שטעט לודמיר, טריסק, און בעלזא.
ביומא דהילולא קדישא פונעם הייליגן צדיק וקדוש רבי שלמה קארלינער זי"ע, וועט מען פוקד זיין דעם ציון הק' אין שטאט לודמיר אין אוקראינע, דערנאך וועט מען פוקד זיין דעם ציון הק' פונעם הייליגן טריסקער מגיד זי"ע אין שטאט טריסק, א ספעציעלע מעמד תפילה וועט פארקומען ביי די ציונים הקדושים פון צדיקי בית בעלזא, וואס ווי באקאנט האלט זיך דער רבי שליט"א א נאנטער חסיד און תלמיד פון הרה"ק מהר"א מבעלזא זי"ע, ממשיך דרכם בקודש פון צדיקי בית בעלזא, וואס מנוחת כבודם דארט אין שטאט בעלזא.
צום הויכפונקט פון די מסע הקודש וועט געפראוועט ווערן א היסטארישע שבת מיטן רבי'ן אינאיינעם, באתרא קדישא ליזענסק אין פוילין, סמוך ונראה צום ציון הק' פונעם הייליגן רבי'ן ר' אלימלך זי"ע. ארגינעל איז געווען געפלאנט אז די שבת וועט געפראוועט ווערן אין שטאט לעמבערג אין אוקראינע, אבער נאך וואס דער רבי האט אויסגעדרוקט רצון קדשו צו פראווענען א שבת אין שטאט ליזענסק, איז באשטעטיגט געווארן אז די שבת וועט אין א היסטארישע פארנעם געפראוועט ווערן אין דעם הייליגן שטאט ליזענסק, דאס הייליג ארט וואו די אויגן פון גאנץ כלל ישראל איז געוואנדן אין יעדע צייט.
פרייטאג אינדערפרי וועט פארקומען די צענטראלע מעמד עלי' לציון צום ציון הק' פונעם הייליגן רבי'ן ר' אלימלך זי"ע, ווען דער רבי וועט מתפלל זיין לישועת הכלל והפרט אינאיינעם מיט די חשובע נגידים ותומכים. מוצאי שבת וועט געפראוועט ווערן א רייכע מלוה מלכה אין שפיץ פונעם רבי'ן, און דערנאך וועט מען זיך ארויסלאזן אויפן וועג צוריק קיין ארץ ישראל.
