א שרעקליכע געשעעניש האט זיך אפגעשפילט דעם שבת קודש אין היכל ישיבה גדולה אמרי חיים וויזניץ אין נייעק, ווען דער נשיא הישיבה כ"ק אדמו"ר מוויזניץ שליט"א פון מאנסי איז געווען צוגאסט אינעם קרית הישיבות און געפראוועט דעם שבת אינאיינעם מיט די תלמידי הישיבה, און א ספר תורה איז געפאלן אויף די ערד רח"ל.
שבת אינדערפרי ווען דער רבי איז געגאנגען פתיחה ביים ארון הקודש בעפאר קריאת התורה, איז ארויסגעפאלן א ספר תורה אויף די ערד רח"ל, די ספר תורה איז נישט געווען גוט אריינגעשטעלט פון פריער, עס האט זיך אנגעלענט אויפן טיר, און דעריבער באלד ווען דער רבי האט געעפנט די ארון הקודש איז די ספר תורה ארויסגעפאלן רח"ל. דער רבי שליט"א האט זיך באלד אראפגעבויגן און אויפגעהויבן די ספר תורה מיט א חרדת קודש.
נאך קריאת התורה האט דער גבאי הרה"ח ר' אייזיק לייב מיללער הי"ו אויסגערופן בפקודת הקודש פונעם רבי'ן, אז אלע וואס זענען געווען אנוועזנד אין בית המדרש בשעת די שרעקליכע פאסירונג זאלן זעהן צו תשובה טאן און מפשפש זיין במעשים, מען זאל אינזין האבן ביים תענית זונטאג ביום צום שבעה עשר בתמוז, אויך צו דעם שרעקליכן פאסירונג, און אזוי אויך זאל מען געבן כופר נפש, אלע בחורים אכצן דאללער, און אלע אינגעלייט זעקס און דרייסיג דאללער.
