איבערראשנדע נייעס ווערט היינט געמאלדן פאר כלל תלמידי וחסידי סאטמאר תושבי מאנסי, אז צום ערשטן מאל וועלן די חסידים תושבי מאנסי האבן די זכיה צו מיטהאלטן א זעלטן געהויבענע שבת בצל הקודש פון כ"ק אדמו"ר מסאטמאר שליט"א, וואס דער רבי וועט פראווענען אין א פראכטפולע האטעל געווידמעט מיט די חסידים פון מאנסי.
יאר יערליך קומט דער סאטמארער רבי אויף א באזוך בקרב חסידיו אין מאנסי, אינעם גרויסן טאג פון ו' אלול, ביומא דהילולא קדישא פון זקינו הק' דער הייליגער ייטב לב פון סיגעט זי"ע, ווען דער רבי פראוועט דעם יארצייט טיש בבית מדרשו אין מאנסי, און נעמט אויף דעם ציבור חסידים תושבי העיר לקראת די ימים הנוראים הבעל"ט.
היי יאר ווען די יומא דהילולא קדישא ו' אלול געפאלט בעצם יום השבת קודש, האט דער סאטמארער רבי אויסגעדרוקט רצון קדשו צו פראווענען דעם שבת בקרב חסידיו תושבי מאנסי, אבער נאכן נעמען אין אכט די געוואלדיגע בליה און וואוקס פון די ציבור חסידים תושבי העיר, ווען עס איז נישט פארהאן א געהעריגע אכסניא וואו צו פראווענען דעם שבת אין שטאט, וואס זאל קענען ארייננעמען דעם גאנצן ציבור חסידים, איז באשטעטיגט געווארן ארויסצודינגען א פראכטפולע האטעל וואו די שבת וועט געפראוועט ווערן ברוב פאר והדר.
אצינד איז באשטעטיגט געווארן אז די פראכטפולע ארמון האטעל אין סטעמפארד קאנעקטיקוט איז געווארן ארויסגעדינגען פאר דעם קומענדיגן שבת קודש פרשת שופטים ו' אלול "שבת הקהל", ווען דער רבי שליט"א וועט פראווענען דארט דעם שבת הילולא קדישא, אינאיינעם מיט די הונדערטער חסידים פון מאנסי און ארום, און די הונדערטער משתתפים חברי הקהילה וועלן האבן די זכיה צו מיטעסן די סעודות שבת קודש אינאיינעם מיטן רבי'ן.
