אין די יעצטיגע טעג איז אונטערגענומען געווארן א מאסיווע בוי פראיעקט דורך הנהלת מוסדות צאנז קלויזענבורג אין בארא פארק, ווען מען גרייט זיך אהערצושטעלן א שפאגל נייע בנין אדיר ומפואר פאר די ישיבה גדולה דחסידי צאנז קלויזענבורג.
די רעדע איז פון א פארקינג לאט ביים ווינקל פון די פערצנטע עוועניו און די פופציגסטע סטריט, מול פני הקודש פון די ביהמ"ד הגדול דחסידי צאנז קלויזענבורג, וואס געפונט זיך אונטער די אייגענטום פון די קהילה. אצינד ווען עס פעלט זיך שטארק אויס א נייע רחבות'דיגע אכסניא פאר די ישיבה הקדושה, איז אונטערגענומען געווארן דעם פראיעקט אויפצובויען א גיגאנטישע בנין פאר די ישיבה דארט אויף דעם שטח.
לויטן פלאן וועט אין די נייע בנין הישיבה צוגערישט ווערן א גרויסע היכל השולחנות, וואו כ"ק אדמו"ר מצאנז קלויזענבורג שליט"א וועט אפרעכטן די געהויבענע טישן מדי שבת בשבתו מיט הרחבת הדעת, און אזוי אויך וועט די בנין הישיבה דינען פאר נאך א רייע באדערפענישן פון די קהילה אין פארשידענע געלעגנהייטן.
אין די זעלבע צייט האט מען אויך אנגעהויבן א זייטיגע פראיעקט, אויפצובויען א נייע פארק פאר די געברויך פון די תלמידי המוסדות, די נייע פארק ווערט געבויעט אינעם ליידיגן שטח אויף די איין און פופציגסטע סטריט ביי די פערצנטע עוועניו, וואו מען שניידט אצינד די ביימער אנצוגרייטן פאר די פאקטישע בוי ארבעט.
